Бүгүн, балаҕан ыйын 24 күнүгэр өрөспүүбүлүкэтээҕи медиа-кииҥҥэ, “Саха” НКИХ үлэһиттэрэ Марфа Пермякова, Елена Эверстова уонна Алена Антонова саҥа сериаллар туһунан суруналыыстарга сырдаттылар. Ол курдук, үс саҥа сериал тахсара күүтүллэр.
“Сүлүһүннээх таптал” диэн көрөөччү биһирэбилин ылбыт сериал салҕыыта, “Сүлүһүннээх таптал. Эргиллии” диэн ааттанан сэтинньи ый 4 күнүттэн көстүөҕэ. Киинэ сценарийын биллиилээх суруналыыс, суруйааччы Сардаана Сивцева – Даана Сард суруйда, режиссера Елена Эверстова, толорооччу продюсер Марфа Пермякова буолаллар. Сүрүн оруолларга Александра Сивцева, Георгий Бессонов, Андрей Михайлов, Евгений Тоскин, Дмитрий Михайлов уһулуннулар. Биир серия 38 мүнүүтэлээх, уопсайа 16 сериялаах буолуоҕа.
Сериал ис хоһоонун кылгастык сырдатар эбит буоллахха, манна билиҥҥи олох көстөр. Аластыровтар оҕолоро тус-туспа дьылҕалаах, олохтоох дьон буолбуттар. Биир сайын кыра бырааттарын көҕүлээһининэн төрөөбүт дэриэбинэлэригэр тахсаллар уонна били сайылыкка бара сылдьарга быһаарыналлар. Сериалы бу сайын икки ый устата Тулагыга, Чурапчы улуһуун Бахсы нэһилиэгэр устубуттар.
Иккис сериал “Иза уонна Лиза” диэн ордук оҕолорго аналлаах буолуоҕа. Ахсынньы 2 күнүттэн көстүөҕэ. Сценарийы Сардаана Сивцева – Даана Сарл суруйбут, режиссердар Саймон Сергеев уонна Радомира Афанасьева, толорооччу продюсер Алена Антонова. Сүрүн оруолларга Люба Сизых, Юлия Хомподоева, Василий Миронов, Евдокия Семенова, Александр Борисов, Сардана Лыткина, Домна Уйгурова оонньоотулар. 38-тыы мүнүүтэлээх 16 сериялаах.
Бу сериалга улаатан эрэр икки кыргыттар туһунан көстүө. Кинилэри төрүүр дьиэҕэ атастаһыннаран кэбиспиттэр. Ону биир кыыс суол саахалыгар түбэһэн хаан наада буолбутугар, төрөппүттэрин киэнэ барсыбат буолан хаалар. Онтон сылтаан кырдьык биллэн барар.
Оттон үһүс сериал “Күдээринэ күүрээн” (Ложный пафос) диэн. Сериал сценарийын ааптара уонна режиссера Марина Платонова, толорооччу продюсер Марфа Пермякова буолар. Сүрүн оруоллары Байтыкан Батаакап, Ильяна Павлова, Алдан Готовцев, Клавдий Афанасьев, Саргылана Горохова, Айсен Лугинов оонньоотулар. 38-тыы мүнүүтэлээх 16 сериялаах. Кэлэр сыл тохсунньу ыйыттан көстүөҕэ.
Киинэҕэ бизнесмен, худуоһунньук кыыс, спортсмен дьон ыра санааларын туһугар күннэтэ охсуһаллар. Онуоха кинилэр суоллара остуол ньуурун курдук көнө буолбат.
“Саха” НКИХ үлэһиттэрэ кэпсииллэринэн, хампаанньаҕа сериал сулууспата тэриллибит. Инньэ гынан, мантан инньэ үлэ чааһын кэнниттэн үүттээх чэй иһэ-иһэ сахалыы араас сериаллары көрөр буолуохпут. Сериаллар бэнидиэнньиктэн чэппиэргэ диэри көстүөхтэрэ. Ону баттаһан көрбөтөх дьон өрөбүл күн хатылааһыны, түөрт серияны субуруччу көрүөхтэрин сөп.
