Балаҕан ыйын 25 күнүгэр Уус Алдантан төрүттээх саха биллиилээх бэйиэтэ, бөдөҥ салайааччы, уопсастыбаннай диэйэтэл, П. А. Ойуунускай аатынан судаарыстыбаннай бириэмийэ лауреата С. С. Васильев – Борогонскай күн сирин көрбүтэ.
Бу бэлиэ күҥҥэ анаан Уус Алдан улууһун Суотту олохтоох библиотекатыгар, оскуола үөрэнээччилэригэр аналлаах “Биһиги Сэргэйбит” диэн литэрэтиирэ күнэ ыытылынна. Библиотека үлэһитэ Раиса Николаевна Черкашина, национальнай култуура учуутала Аксения Ивановна Копырина, оҕолорго биллиилээх биир дойдулаахпыт олоҕун, айар үлэтин, кини айымньыларынан умсугутар сыаллаах бу тэрээһини ыыттылар.
Профессиональнай үөрэхтээһин бэтэрээнэ, Суотту нэһилиэгин бочуоттаах олохтооҕо Серафим Данилович Федоров, Сергей Васильев төрдүн-ууһун туһунан кэпсээтэ. Ону таһынан, бэйиэт Н.Н. Окоемовка анаабыт хоһоонун аахта.
Салгыы 7 кл үөрэнээччитэ, Сергей Васильев хос сиэнэ Айысхана Васильева, Сахаяна Ермолаева хоһоонун долгутуулаахтык аахта.
Оҕолор бэйиэт олоҕун, айар үлэтин кытта ыкса билистилэр, “Улуу Ленам” хоһоону өйтөн аахтылар, бириистээх викторинаҕа көхтөөхтүк оонньоотулар.
Түмүккэ “Дьон норуот сааскыта”диэн ырыаны толордулар.
