Алтынньы 17-20 күннэригэр Дьокуускай куоракка, Арассыыйа норуоттарын муоһу кыһыы ускуустубатын VII бэстибээлэ ыытыллыа. Манна дойду 15 эрэгийиэниттэн маастардар кэлэн кыттыахтара. Ону таһынан, үс тас дойду бэрэстэбиитэллэрэ кытталлара күүтүллэр. Бу туһунан СӨ култуура уонна духуобунай сайдыы миниистирин бастакы солбуйааччы Владислав Левочкин иһитиннэрэр.
Бу бэстибээл 2005 сылтан ыытыллар. Быйыл 2,8 мөл солк суумалаах Бэрэсидьиэн гранын пуондатын өйөбүлүнэн тэриллэр. Манна Гренландияттан, Данияттан, Аляскаттан уонна Хабаровскайтан, Камчатскайтан, Красноярскай, Приморскай кыраайдартан, Архангельскай, Московскай, Магаданскай, Тюменскай уобаластартан, Чукотскай, Ямало-ненецкай, Ненецкай автономнай уокуруктартан, Алтайтан, Бурятияттан уонна Тываттан маастартар кэлиэхтэрэ.
Бэстибээл иһинэн “Традиции и современность косторезного искусства народов России” диэн научнай-практическай конференция, быыстапка-дьаармарка, “Сказ на бивне мамонта” диэн куоҥкурус, ону таһынан, маастар-кылаастар ыытыллыахтара. Ыалдьыттар муоһу кыһыы ускуустубатын сайыннарыы уонна баар кыһалҕалары быһаарыы боппуруостарын дьүүллэһиэхтэрэ.
