Киирии

Киирии

Алтынньы 11 күнүгэр Өксөкүлээх Өлөксөй аатынан норуоттар доҕордоһууларын дьиэтигэр киэһэ 18.00 ч.  саха ыала  25 сыл устата үтүө доҕор, бастыҥ сүбэһит оҥостон кэлбит сурунаалын үбүлүөйдээх дьоро киэһэтэ буолар.

Ааспыт үйэ 90-с сылларыгар дьиэ кэргэн политиката, ыал экономиката олоххо киирэн, уларыта тутуу уустук кэмигэр саха ыалыгар улахан өйөбүлүнэн буолбута. Билэрбит курдук, ол кэмҥэ Дьахтар, дьиэ кэргэн, оҕо-аймах боппуруоһунан дьарыктанар бүтүн судаарыстыбаннай тэрилтэтэ Саха сирин маҥнайгы Президенэ Михаил Ефимович Николаев ыйааҕынан тэриллибитэ. Ырыынак сыһыаныгар көһүү дойду үрдүнэн дьалҕааннаах бириэмэтигэр бу тэрилтэ, кырдьыга да, дьоҥҥо-сэргэҕэ тирэҕинэн буолбута саарбаҕа суох. Дьоҕус тэрилтэ тустаах дьон, ыал кыһалҕатын түргэнник быһаарарыгар табыгастаах этэ.

 Мин ол кэмҥэ “Саха сирэ” хаһыакка социальнай политика салаатын редакторынан үлэлии сылдьар кэмим этэ.  Дьиэ кэргэн комитетын үлэһиттэрин кытта өрөспүүбүлүкэ араас улууһун кэрийдибит ини кэрийбэтибит ини! Комитет бастакы председателин Анастасия Николаевна Божедонованы кытта ыллыбыт даҕаны нэдиэлэни нэдиэлэнэн араас улууска тиийэн дьону кытта тус көрсөн, үлэлиирбит. Ордук уустук кэмнэр бүрүүкээбит 90-с сыллар ортолоругар  Комитет салайааччыта  көмө таҥаһы-сабы бэйэтэ тиэйэ сылдьан, ханнык да көмөлөһөөччүтэ суох тарҕатара, дьону кытта көрсөн кэпсэтэн кыһалҕаларын быһаарара. Бу баардыы өйдүүбүн Горнайга элбэх оҕолоох эдэр ыалга дьиэлэригэр тиийэн, таҥас арааһын биэрбитин. Маҥнайгы кылааска киириэхтээх уолчааҥҥа хара сигиэйкэ саҥыйаҕы кэтэрдэн кэбиспитигэр уолчаан үөрдэ да этэ!  Ол оҕо үөрэн чоҕулуҥнаспыт хараҕын күн бүгүн умнубаппын. Бэлиэтээн эттэххэ, билиҥҥи кэм курдук биллэ-көстө сатааһын, үтүө дьыаланы оҥорон баран дьонтон хайҕабыл көрдөөһүн диэн букатын суоҕа. Мин суруналыыс быһыытынан оннук биирдиилээн көмөнү суруйбакка, уопсайынан тыа ыала хайдах-туох олорорун туһунан аһаҕастык суруйар этим. Ким да миэхэ оннук суруй, маннык эт диэбэт этэ. Бу санаатахха, биһиги түмүк санаабыт бэйэбит киэнэ эбит. Хаһыаппыт сирэй редактора Василий Васильевич Кириллин эмиэ хаһан даҕаны ыстатыйабыт ис хоһоонугар орооспот этэ.

Ол көҥүл тыыннаах  кэммитин “Далбар Хотун” сурунаал хаппыта туһунан олохпут биир кэрэ-бэлиэ историята буоллаҕа. Өйдүүргүт буолуо, оччолорго хаһыат, сурунаал аҕыйах этэ, дьиэ кэргэҥҥэ анаммыт сурунаал олох даҕаны суоҕа. Онон сурунаалбыт редактора Наталья Ивановна Харлампьева дьахталларга, дьиэ кэргэҥҥэ аналлаах, туспа тыыннаах  сурунаал наада диэн тыл көтөхпүтэр   тута өйөбүл ылбыта. Дьиэ кэргэн политикатын тарҕатыы, ыал олоҕун бөҕөргөтүү салгын курдук наадалаах кэмэ буолан, сурунаал түргэнник тахсыбыта.   

Биһиги ол кэмҥэ Наталья Ивановнаны кытта хаһыакка бииргэ үлэлии сылдьар дьон, сурунаал редколлегиятын чилиэнинэн киирэн, наһаа таһаарыылаахтык, астынан туран сурунаалга анаан матырыйааллары суруйан барбыппыт. Ордук миэхэ, инникитин даҕаны бу темаҕа суруйар киһиэхэ айар аартыгым суола аһыллыбыта. Комитет үлэһиттэрин кытта наар командировкаҕа тыа сиригэр айанныыр суруналыыс матырыйаалым да баай буолааччы. Сороҕун хаһыаппар, сороҕун сурунаалбытыгар суруйан, олус да өрө күүрүүлээхтик үлэлээбиппит.  Биһиги сурунаалтан илиибитин араарбакка, биэстэн тахса сыл үлэлээбиппит. Олус түргэнник сурунаалбыт 5 сыллаах  үбүлүөйэ тирилээн кэлбит курдуга.  Наталья Ивановна оччолорго юбилейынан диэн, биһигини үөрдээри сурунаалга суруйар суруналыыс кыргыттарга барыбытыгар  “Якутзолото” тэрилтэни кытта кэпсэтэн, кыһыл көмүс ытарҕалары бэлэхтээбитэ. Соһуччу бэлэххэ үөрдүбүт да этэ!

Билигин оччотооҕу сурунаал саһарбыт страницаларын арыйан көрдөххө, республика олоҕо бүтүннүүтэ көстөр. Холобур буолар бастыҥ ыаллартан саҕалаан  ийэлэргэ, дьыалабыай дьахталларга, сиэр-майгы тематыгар тиийэ баай ис хоһоонноох нүөмэрдэри астына көрөҕүн.   Сурунаал хаһыат халыыбыттан ураты, ордук киэҥник хорутан, аргыый-наллаан геройдары арыйаргар кыах биэрэр. Мин “Далбар Хотун” сурунаалга үлэлиир кэммэр араас дьылҕалаах, олоххо ураты көрүүлээх саха дьахталларын туһунан суруйбуппун истиҥник саныыбын. 

Кэлин хаһыаппыт кылаабынай редактора Василий Васильевич Кириллин миэхэ улахан эрэли сүктэрэн, ”Саха сирэ” хаһыат халыҥ нүөмэрин редакторынан анаабыта. Биһиги, социальнай салаа үлэһиттэрэ, туох да омуна суох, утуйар да ууну умнан туран, элбэх страницалаах саҥа хаһыаты нэдиэлэ аайы таһааран барбыппыт. Онон, этэргэ дылы, ыырбыт өссө кэҥээн, “Далбар Хотуҥҥа” уонна өрөспүүбүлүкэ сүрүн хаһыатыгар тэҥинэн үлэлээбиппит. Ол кэммин билигин олус сылаастык, махтанан туран саныыбын. Онон суруналыыс, суруйааччы буоларбар олук уурбут истиҥник саныыр сурунаалбар,  кылаабынай редакторбар Наталья Харлампьеваҕа, эппиэт сэкэритээргэ Аита Шапошниковаҕа, “Саха сирэ” хаһыакка бииргэ алтыһан, олус айымньылаахтык үлэлээбит биир идэлээх дьүөгэлэрбэр ис дууһаттан тахсар истиҥ махталбын тириэрдэбин!

Айар үлэ дьолун бэлэхтээбит күндү сурунаалбыт билиҥҥи үлэһиттэрин, ааҕааччыларын, араас кэмҥэ сурунаалга үлэлээбит биир идэлээхтэрбин “Далбар Хотуммут” дьоһуннаах юбилейынан эҕэрдэлиибин! Сурунаал кырдьыгы, дьиҥ олоҕу суруйар, чахчы ситиһиилээх дьону сырдатар аналын ыһыктыбакка толоро сылдьарыттан үөрэбин! Инникитин тахсар нүөмэрин элбэтэн, страницатын эбэн, элбэхтик тыа сиригэр, ааҕааччыларга тиийэн кинилэр билиҥҥи олохторун сырдатан, ураты буочаргытын ыһыктыбакка, үлэлээн суһумнаныҥ!

 Айталина Никифорова, суруналыыс, суруйааччы, sakhalife.ru

Тарҕат:

Комментарии

Защитный код Обновить