Войти

Войти

Оһуокай Саха сиринээҕи түмсүүтүн уопсастыбата 50 000 – тахса чилиэннээх. 31- с сылын тэриллэн үлэлиир түмсүүнү бастаан Николай Егорович Петров онтон Анатолий Иванович Кривошапкин, билигин Александр Джурович Данилов салайар. Быйыл буолбут кэмпириэнсийэҕэ Оһуокай түмсүүтүн чилиэттэрэ бары биир санаанан үрдүк итэҕэлинэн саҥа сэбиэт чилиэннэрин талбыттара.

Бары билэргит курдук, кэнники сылларга Оһуокай түмсүү үлэтэ күүстээхтик ыытыллар. Үҥкүү этээччилэр айар сойуустара тэрилиннэ. Улуустарга филиаллар аһылыннылар. Куорат пааркатыгар Оһуокай аллеята аһыллынна. Үтүөлээх, Дархан, Аар Дархан этээччилэрбит хаартысканан портреттарыттан саха сирин инники сайдыытын өтө көрө олороллор.

Хас өрөбүл ахсын Арчы дьиэтигэр оттон сайыҥҥы, күһүҥҥү өттүгэр пааркаҕа оһуокай тохтоло суох барар. Баҕалаах киһи ыллаан, оһуокайдаан барар. Манна оһуокай чилиэттэрэ эрэ сылдьыбаттар, ким баҕалаах барыта сылдьар. Биһиги уопсастыбабыт аана мэлдьи өрүү аһаҕас. Кырдьаҕастыын, эдэрдиин ким баҕалаах барыта этэр. “Саҥа этэн эрэҕин” диэн хааччах суох. Улууска олорор биллиилээх этээччилэрбит куоракка кэллэхтэринэ биһигини быһа ааспаттар, кэлэн дуоһуйа этэн, киэҥ түһүлгэни төрүттээн бараллар.

Биһиги тэрилтэбитигэр аҕа саастаах этээччилэрбитин быһа гыммакка, көрдөһүү туруорсууларын өйөөн, Дьокуускай куорат баһылыга Сардаана Авксентьева, паарка дириэктэрэ Григорий Гурьев пааркаҕа Оһуокайбыт түһүлгэтин бетонката эргэрэн, хас да сиргэ аһаҕастаммытын, хос көтүрдүлэр уонна кыстык иннинэ саҥаттан өрөмүөннэттилэр. Дэхси гынан асфаллаабыттар. Онон оһуокайдьыттар сүргэлэрэ улаханнык көтөҕүлүннэ.

Аны сайын, күһүн үҥкүүлүүрбүтүгэр бэртээхэй усулуобуйа оҥоһуллубутуттан үөрдүбүт. Сардаана Авксентьеваҕа махтанан туран, биһиги куорат үлэтиттэн туора турбаппытын биллэрэбит. Кыахпыт иһинэн куорат култуурнай тэрээһиннэригэр мэлдьи кыттарга бэлэммит, ыытар үлэтин биһириибит, өйүүбүт. Куорат сайдыытыгар Оһуокай уопсастыбата туора турбатын биллэрэбит.

 

Саха өрөспүүбүлүкэтин Ытык Оһуокай

түмсүүтүн сэбиэтэ.

Тарҕат:

Комментарии

Защитный код Обновить