Киирии

Киирии

Сэтинньи 10 күнүгэр Суорун Омоллоон аатынан опера уонна балет тыйаатырыгар киэһэ 17.00 уонна 20.00 чаастан, Саха эстрадатын примадонната, СӨ үтүөлээх артыыһа, режиссер Сахая, “Ырыаһыт дьылҕата” диэн 25 сыллаах айар үлэтин бэлиэтиир дьоро киэһэтигэр куорат олохтоохторун уонна ыалдьыттарын ыҥырар.

Бүгүн, сэтинньи 6 күнүгэр кэнсиэр тэрийээччилэрэ уонна Сахая суруналыыстары кытта көрүстүлэр. Бэлиэтээн этэр буоллахха, Сахая бүтэһигин биэс сыл анараа өттүгэр “Рождество с Примадонной” диэн түһүлгэтин тэрийбитэ. Онон сүгүрүйээччилэрэ “хаһан кэнсиэрдиигин...?” диэн көһүппүттэрэ ыраатта. Үбүлүөйдээх тэрээһин урукку сылларга ыытыллыбыт кэнсиэрдэргэ майгыннаабат, бары өттүнэн ураты, чаҕылхай буолара күүтүллэр. Ол курдук, тэрийээччилэр бары олус эдэрдэр, сонун көрүүлээх, идиэйэлээх ыччат. Холобур, режиссер Андрей Никифоров хас даҕаны дьоһун үлэтинэн дьоҥҥо-сэргэҕэ биллэн эрэр. Ол курдук, модельер Августина Филиппова, эдэр ырыаһыт Майя Сергина айар кэнсиэрдэрин уонна бу соторутааҕыта эрэ ыытыллыбыт “Үс иэйии күрүлгэнэ” диэн Саргы Куо, Сайа, Арылы Дуйдаах хоһооннорунан ылбаҕай ырыа, хомоҕой хоһоон түһүлгэтин режиссера буолар. Оттон Сахая уобараһын стилист Дмитрий Васильев чочуйуо, продюсер Нюрбина Николаева уонна администратор Кирилл Матвеев үлэлииллэр.

Көрсүһүүгэ Сахая кэпсэтиини бэйэтин билиһиннэрииттэн саҕалаата: “Мин 1974 сыллаахха тохсунньу 26 күнүгэр Кэбээйигэ күн сирин көрбүтүм. Аҕам Мэҥэ-Хаҥаластан төрүттээх, опера ырыаһыта, тенор. Кэнсиэрбэр аҕабын кытта иккиэн ыллыахтаахпыт. Онон олус долгуйа, бэлэмнэнэ сылдьар, сыанаҕа тахсыбатаҕа ыраатта. Мин оҕо эрдэхпиттэн ырыаһыт буолар ыра санаалаах этим. Оскуола кэнниттэн медучилищаны бүтэрбитим. Биэс сыл мэдиссиинэ эйгэтигэр үлэлээбитим. 1994 сыллаахха  Николай Донской бэлиэтии көрөн, “Сахая” диэн бырайыагар ыҥырбыта. Ол саҕана Евгения Львова диэн кыыс солискалыыр этэ. Кини сахалыы ыллаабат буолан, альбомҥа киириэхтээх ырыалары мин толорбутум. Ол эрэн, сыанаҕа тахсыбат этим. Онтон  альбоммут дьон-сэргэ сэҥээриитин ылбытын кэннэ Евгения тохтообута. Инньэ гынан, сыанаҕа  тахсар буолан хаалбытым. Бу сыл айар кэнсиэрбит буолбута. Онтон ыла ырыанан ылсан туран дьарыктанарга быһаарыммытым. 1996 сыллаахха Юрий Платонов айар мастарыскыайыгар дьарыктаммытым. Манна Сайыынаны, Варя Аманатованы, Чыскыырайы уо.д.а. кытта билсибитим. Эстрада тыйаатырыгар  үлэҕэ тута ылбыттара. Ол кэмтэн ыла номнуо 23 сыл ааста. Уон сыл анараа өттүгэр бүтүн Арассыыйатааҕы Масляков аатынан айар мастарыскыайга үөрэммитин. Арассыыйа үгүс биллэр ырыаһыттарын кытта билсибитим. Иосиф Кобзоны кытта гостуруолга сылдьыбытым. Бу, биллэн турар, миэхэ улахан үөрүйэҕи  биэрбитэ. Онтон ГИТИС-кэ режиссер идэтигэр үөрэммитим, ол кэнниттэн судаарыстыбаннай сулууспа академиятыгар магистратураны бүтэрбитим”.

Кэнсиэр ыытааччыта суох буолуоҕа. Сахая бастыҥ модельердар Юрий Лукин, Иван Федоров, Амгалена Барашкова уо.д.а тикпит таҥастарын кэтиэҕэ. Онон, бииртэн биир хатыламмат уобарастары көрүөххүт. Ону таһынан, бастакы продюсера Николай Донской, Байбал Сэмэнэп, дьүөгэтэ Анастасия Готовцева, Николай Роббек уонна дьиэ кэргэнэ, оннооҕор кырачаан Сан Саныч кыттыыны ылыахтара. Тыыннаах муусука эмиэ баар буолуоҕа.    Онон көрөөччүнү 2,5 чаас устата ыллам ырыа, кэрэ көстүү күүтэр.

Венера ОХЛОПКОВА

Тарҕат:

Комментарии

Защитный код Обновить