Киирии

Киирии

СӨ Национальнай бибилэтиэкэтэ, СӨ судаарыстыбаннай эстрада тыйаатыра уонна “Ситим” медиа-бөлөх “Google” култуура академиятын былаһааккатыгар, “Айархаан” этно-бөлөҕү төрүттээччи Альбина Дегтярева айар үлэтигэр анаммыт саҥа виртуальнай быыстапканы арыйдылар.

Альбина Михайловна Дегтярева — мусукаан, хампаһыытар, үгүс ырыа ааптара, уһуйааччы, аан дойдуга аатырбыт “Айархаан” этно-бөлөҕү төрүттээччи, салайааччы уонна эстрада тыйаатырын хомусчута. Альбина Дегтярева уонна кини “Айархаан” бөлөҕө норуоттар икки ардыларынааҕы араас бэстибээллэргэ кыттан лауреат аатын сүгэн,   саха хомуһун аан дойдуга таһаарбыттара. Саха хомуһа өрөспүүбүлүкэ култуурунай брендэ эрэ буолбакка, “world music” көрүҥ хайысхата буолла. Бу билигин саарбаҕа суох классика буолар. Үгүс батыһааччылаах, олор истэригэр үөрэнээччилэрэ эмиэ бааллар.   Ол курдук, Саха сиригэр биллэр эдэр хомусчуттар Юлияна Кривошапкина – Дьүрүйээнэ, Нарияна Ренанто, Амгаяна Нестерова, Олена Уутай (Ольга Подлужная), Айсен Аммосов, Артур Семенов – Тоҥ Саха, Алиса Саввинова, Талин Туя (Кытай), Хусейн Акбаш (Турция), Саюри Эхара (Япония) уо.д.а.

10297

““Айархаан эйгэтэ” виртуальнай быыстапкаҕа кэлбит дьону кытта кэпсэтии олохтуу сатаатыбыт. Саха аныгы хомуһун үөскээбит устуоруйатыгар, тыаһыгар-ууһугар уонна сүрүн дьоруойбут айар үлэтигэр умсугутуохпут. Быыстапка Альбина Михайловна үбүлүөйдээх тэрээһинигэр ананар”, – диэн национальнай бибилэтиэкэ кинигэ паматынньыгын научнай-чинчийэр киин үлэһитэ, “Аан дойдуга Саха сирин култуура” (“Google” култуура академиятын былаһааккатыгар Саха сирин култуурунай институцияларын киллэрии) бырайыак салайааччыта Алексей Иванов этэр.

““Google” култуура академиятын кытта бииргэ үлэлээһин түмүгүнэн, Саха сирин култуурунай-историческэй нэһилиэстибэтэ аан дойдуга аһаҕас буолар. 2019 сыл устата бибилэтиэкэ 11 виртуальнай быыстапка бырайыагын тэрийдэ. Google” култуура академиятын былаһааккатыгар бибилэтиэкэ сирэйин аан дойдуттан 3500 киһи көрбүт. Олортон саамай көхтөөхтөр Арассыыйаҕа, АХШ-гар, Бразилияҕа, Финляндияҕа, Великобританияҕа, Украинаҕа, Францияҕа, Испанияҕа, Германияҕа, Индияҕа, Австралияҕа уо.д.а. олороллор”, – диэн национальнай бибилэтиэкэ дириэктэрин бастакы солбуйааччы Василий Борисов кэпсиир.

RM8 0185

““Айархаан” этно-бөлөх 2004 сылтан үлэлиир. Салайааччы мындыр, үлэһит буолан, өрөспүүбүлүкэҕэ соҕотох, идэлээх хомусчуттар бөлөхтөрө саха норуотун култууратын уонна үгэһин Арассыыйаҕа эрэ буолбакка, аан дойдуга эмиэ таһаардылар. Бүгүн биһиги үөрүүлээх сонуну иһиттибит. Ол курдук, айархааннар “Russian World Music Awards” диэн этническэй муусуканы толорооччуларга бэриллэр соҕотох бириэмийэ   биир кыайыылааҕынан буоллулар. Бу Саха сиригэр Хомус декадатын кэмигэр түбэспитэ бэлиэ дии саныыбын. Альбина Дегтярева уонна кини үөрэнээччилэрин ситиһиилэринэн ис сүрэхпиттэн үөрэбин. “Айархаан эйгэтэ” талааннаах кэллэктиип үбүлүөйүгэр анаммыт быыстапка,   аан дойдуга саха хомуһун уонна бөлөх сүгүрүйээччилэрин ахсаанын элбэтиэ диэммин эрэнэбин”, – диэн “Ситим” медиа-бөлөх генеральнай дирэктэрэ, Ил Түмэн дьокутаата Мария Христофорова баҕа санаатын эттэ.

 

https://artsandculture.google.com/exhibit/%D0%BC%D0%B8%D1%80-%D0%B0%D0%B9%D0%B0%D1%80%D1%85%D0%B0%D0%B0%D0%BD/2wLyV5RhQEfaKA

 

Тарҕат:

Комментарии

You have no rights to post comments

Бүтэһик сонуннар