Мииринэйгэ саха оҕолор хомустуурга, ыллыырга-туойарга үөрэнэллэр

Мииринэй куоратын саха оҕолоро “Алмаас” култуура дыбарыаһыгар, ЦДОД-ка муусука оскуолатыгар араас уһуйааннарга сылдьаллар.

Саха оҕолоро төрөөбүт тылларынан ыллыырга үөрэнэллэр. ЦДОД-ка эдэр талааннаах уһуйааччы Надежда Кан салайыытынан, “Кэскил” фольклор ансаамбыла тэриллэн үлэлиир. Араас кэнсиэртэргэ куруук кыттыыны ылаллар. Мииринэйгэ саха ахсаана аҕыйах. Сахалыы кэпсэтэр эйгэ кыраҕас. Оҕолор үгүстэрэ төрөөбүт тылларын билбэттэр. Ол да буоллар, норуоттарын төрүт уус дьоҕурдарын баһылыырга дьулуурдара улахан. Бу соторутааҕыта Мииринэйдээҕи муусука оскуолатыгар саха хомуһугар үөрэтэр уһуйаан арылынна. Урут маннык куруһуок суоҕа. Хомус тардарга үөрэниэн баҕалаах 6,5 – 12 диэри саастаах оҕолору ыҥырбыттара. Манна кэлбит оҕолор бэйэлэрин талааннарын сотору көрдөрүөхтэрэ дии саныыбын. Аны туран, Мииринэйгэ “Чуораанчык” оҕо ансаамбыла тэриллибитэ бэрт кыра кэм буолла. Манна кыра уонна орто саастаах оҕолор дьарыктаналлар. Күн бүгүнүгэр диэри киэҥник, хотуулаахтык кэнсиэрдии иликтэр. Сэтинньи 30 күнүгэр “Алмаас” култуура дыбарыаһыгар бастакы улахан кэнсиэртэрэ буолуоҕа. Бу тэрээһин сонун, кэрэ-бэлиэ буолуо диэн эрэнэбит.