Войти

Войти

Сэтинньи 19 күнүгэр Намҥа, “Эҥсиэли” улуустааҕы хаһыат саҥа дьиэтин үөрүүлээх арыллыыта буолан ааста. Бу туһунан Инновация министиэристибэтин пресс-сулууспата иһитиннэрэр.

Үөрүүлээх тэрээһиҥҥэ Инновация миниистирэ Анатолий Семенов, улуус баһылыга Юрий Слепцов, хаһыат сүрүн эрэдээктэрэ Владислав Касьянов кыттыыны ыллылар.

Бу олус күүтүүлээх уонна үөрүүлээх тэрээһин. Тоҕо диэтэххэ, улуустааҕы хаһыат эрэдээксийэтигэр бүтэһик уон сылга бастакы улахан тутуу буолар. “Эҥсиэли” хаһыат олус баай устуоруйалаах, үгэстээх уонна улахан үөрүйэхтээх кэллэктииптээх. Онон, ааҕааччыга интэриэһинэй хаһыаты таһаарарга кыах баар”, – диэн миниистир Анатолий Семенов эттэ.

Ону таһынан, саҥа эрэдээксийэҕэ олохтоох телестудияны уонна радионы олохтуур кыах баарын бэлиэтээтэ.

Хаһыат сүрүн эрэдээктэрэ Владислав Касьянов тутуу үлэтэ өр кэм ыытыллыбытын кэпсээтэ. Ол да буоллар, хаһыат эрэдээксийэтэ саҥа дьиэҕэ киирбитинэн үөрүүтүн үллэһиннэ.

“Эҥсиэли” хаһыат устуоруйата 1935 сылтан саҕаланар. Ол саҕана улууска “Колхуос сирдьитэ” диэн бастакы хаһыат тахсыбыт. 1961 сыллаахха хаһыат аата “Ленин суола”, оттон 1991 сылга “Эҥсиэли” диэн уларыйбыт. 

 

yakutia24.ru/

Тарҕат:

Комментарии

Защитный код Обновить