Сэтинньи 25 күнүттэн Олоҥхо декадата саҕаланар. Бу туһунан СӨ култуура министиэристибэтин пресс-сулууспата иһитиннэрэр.
Өрөспүүбүлүкэ үрдүнэн 15 күн устата Олоҥхоҕо анаммыт араас тэрээһиннэр ыытыллыахтара. Ол курдук, кэнсиэртэр, кинигэ сүрэхтэниилэрэ, быыстапкалар, научнай конференциялар, испэктээкиллэр уо.д.а. Олоҥхо декадата сэтинньи 25 күнүттэн ахсынньы 10 күнүгэр диэри буолуоҕа. Олоҥхо күнэ аан бастаан 2006 сыллаахха ыытыллыбыта. Ол кэмтэн ыла сылын аайы Олоҥхо декадата буолар.
Декада үөрүүлээх арыллыыта Дьокуускай куоракка сэтинньи 25 күнүгэр Өксөкүлээх Өлөксөй аатынан норуоттар доҕордоһууларын дьиэтигэр буолуоҕа. Манна саха норуотун сүдү нэһилиэстибэтин тарҕатыыга национальнай бириэмийэни туттарыахтара. Ону таһынан, ураты, интэриэһинэй туруорууну көрдөрүөхтэрэ. Быыстапка тэриллиэҕэ.
Бу күннэргэ ыытыллар тэрээһиннэр: “Ыалга олоҥхолооһун” бырайыак (олоҥхоһут Гаврил Спиридонов), “Уруйдан, улуу олоҥхобут!” олоҥхоһуттар бэстибээллэрэ, куораттааҕы уонна куорат таһынааҕы оскуолаларга Үүнэр көлүөнэ тыйаатыра көһө сылдьан испэктээктэри көрдөрүөҕэ, Мария Андросова-Ионова төрөөбүтэ 155 сылыгар анаммыт “Памяти народной сказительницы…” диэн виртуальнай быыстапка тэриллиэҕэ, Иннокентий Тимофеев-Теплоухов төрөөбүтэ 150 сылынан олоҥхоһуттар I өрөспүүбүлүкэтээҕи куоҥкуруһа ыытыллыаҕа, ыччакка аналлаах “Олоҥхо дойдутугар” тэрээһин уонна испэктээктэр, конференциялар, семинардар, кинигэ сүрэхтэниилэрэ уо.д.а.
П.А. Ойуунускай аатынан СӨ судаарыстыбаннай бириэмийэ лауреата Агафья Захарова үбүлүөйдээх конференциятыгар, Турцияттан биллиилээх учуонайдар Метин уонна Первин Эргюн кэлэллэрэ күүтүллэр. Кинилэр аан дойду таһымыгар Олоҥхону үөрэтиигэ сүҥкэн кылааты киллэрбиттэрэ.
Олоҥхо декадатыгар баҕалаах дьон бары кыттыахтарын сөп.
Ахсынньы 10 күнүгэр декада сабыллыытыгар “Кулан Кыыртай” диэн Олоҥхо-испэктээк сүрэхтэниитэ буолуоҕа. Режиссер Зоя Попова.
Интэриниэт хаартыската
