Сэтинньи 20 күнүгэр Ем. Ярославскай аатынан түмэлгэ, “Күн сирин айыытын Ойууна” диэн саха улуу ойууна Владимир Алексеевич Кондаков төрөөбүтэ 80 сылыгар анаммыт быыстапка арылынна.
Владимир Алексеевич саха норуотун мэдиссиинэтин, былыргы итэҕэлин чинчийбитэ. Кини норуот мэдиссиинэтинэн 1968 сыллаахтан дьарыктаммыта. Онно улахан оруолу улуу ойуун, эмчит Г.Г. Герасимов ылар. Георгий Герасимович талааннаах эдэр киһини тута бэлиэтээбитэ. Владимир Алексеевич өр кэм устата кырдьаҕас ойуун эмтиир сеанстарыгар сылдьан, кини араас ньымаларыгар, албастарыгар, гипноз киһиэхэ дьайыытыгар үөрэммитэ уонна фитотерапиянан дьарыктаммыта.
1990 сыллаахха СӨ Норуодунай мэдиссиинэ ассоциацията тэриллибитэ. Манна Владимир Алексеевич бэрэсидьиэнинэн талыллыбыта. Кини салайыытынан үгүс элбэх чинчийэр уонна көрдүүр үлэлэр ыытыллыбыттара.
1992 сыллаахха сэттэ сыллаах Норуодунай мэдиссиинэ уонна духуобунас үрдүкү оскуолатын тэрийбитэ.
1995 сыллаахха мэдиссиинэ билимин доктора буолбута уонна профессор аатын ылбыта. Оттон 1996 сыллаахха уйулҕа билимин доктора буолбута.
В.А. Кондаков сахалар былыргы итэҕэллэрин, норуодунай мэдиссиинэ туһунан элбэхтэ суруйбута. Ол курдук, 30 тахса кинигэ ааптара. Былыргы итэҕэл туһунан саамай улахан үлэтэ – “Аар Айыы Итэҕэлэ”. Ону таһынан, икки туомнаах уус-уран айымньыта “Айыы ойуун” уонна “Благословляющие горизонты. Орлиный полет” диэн арамаан бастакы чааһа буолар.
“Күн сирин Айыытын Ойууна” быыстапкаҕа Владимир Алексеевич ойууннаабыт таҥаһа-саба, Амынньыкы Уус оҥорбут дүҥүрэ, холотууската, ону таһынан, кинигэлэрэ, наҕараадалара, тутта сылдьыбыт мала-сала, Саха сирин биллиилээх эмчиттэрин хаартыскалара уо.д.а турдулар.
Быыстапка ахсынньы 20 күнүгэр диэри үлэлиир.
