Ахсынньы 7 күнүгэр Суорун Омоллоон аатынан опера уонна балет тыйаатыра, Таатта улууһун национальнай тыйаатырыгар “Чурумчуку” испэктээги көрдөрүөҕэ. Сүрүн баартыйаны Ньургуйаананы Юлия Мярина уонна булчут Чурумчукуну Сарыал Афанасьев толоруохтара. Бу туһунан тыйаатыр пресс-сулууспата иһитиннэрэр.
Гостуруоллар Саха сирин бастакы идэлээх үҥкүүһүтэ, уһуйааччы, балетмейстер Иннокентий Христофоров төрөөбүтэ 100 сылынан уонна норуодунай бэйиэт Серафим Кулачиков – Эллэй төрөөбүтэ 115 сылынан үбүлүөйдээх тэрээһиннэр чэрчитинэн ыытыллар.
Санатар буоллахха, “Чурумчуку” балет быйыл 55 сылын бэлиэтиир. Аан бастаан 1964 сыллаахха сүрэхтэммитэ. Испэктээк композитора Жигжит Батуев (Бурятия), хореограф Кира Карпинская (Москуба), дирижер Галина Кривошапко уонна худуоһунньук Василий Антонов.
