Нам Бөтүҥүн кулуубугар чаҕылхай ырыаһыт Семен Оконешников сырдык аатын иҥэрдилэр. Бу туһунан Суорун Омоллоон аатынан опера уонна балет театрын пресс-сулууспата иһитиннэрэр.
“Биһиги аатырбыт биир дойдулаахпыт сырдык аатын үйэтитэр туһунан этиини улуус баһылыга Юрий Слепцов киллэрбитэ. Дьокутааттарбыт бүтэһик сессияҕа ити боппуруоһу көрөн баран, Бөтүҥнээҕи “Айылгы” култуура киинигэр Семен Оконешников аатын үйэтитэр туһунан биир санааннан ылыммыттара. Маны таһынан Семен Оконешников сырдык аатыгар сүгүрүйэн мэҥэ дуосканы арыйдыбыт”, - диэн улуустааҕы култуура управлениетыгар кэпсээбиттэр.
Семен Оконешников – РФ народнай артыыһа, РСФСР үтүөлээх артыыһа, өрөспүүбүлүкэ народнай артыыһа, тенор. Кини опера уонна балет театрыгар 55 сыл устата эҥкилэ суох үлэлээбитэ, онтон 43 сыл устата – опера солиһынан.