Ахсынньы 20 күнүгэр Археология уонна этнография түмэлигэр “Кустук курдук куоһанан” диэн Хотугулуу-Илиҥҥи олорор норуоттар тылларын уонна култуураларын үөрэтэр институт доцена, историческай наука хандьыдаата, “Уран иис” үрдүкү маастарыстыба оскуолатын салайааччы, Саха сирэ уонна Арассыыйа худуоһунньуктарын сойууһун чилиэнэ Светлана Иванова Петрова дьоро күнүгэр, бэйэтин тула муспут үөрэнээччилэрэ: саха таҥаһын тигэринэн дьарыктанар ааттаах иистэнньэҥнэр, киэргэллэри оҥорор дизайнердар бэйэлэрин үлэлэрин көрдөрдүлэр.
Дьоро киэһэни бүтүн Арассыыйатааҕы судаарыстыбаннай телерадио хампаанньа “Россия 1” ханаал кэрэспэндьиэнэ Ирена Осипова уонна “Вести-Саха”, “Аһаҕас кэпсэтии” ыытааччыта, “Россия 24” ханаалга тахсар “Тележурнал” биэрии эрэдээктэрэ, Арассыыйа суруналыыстарын сойууһун чилиэнэ Ньургуйаана Феоктистова иилээн-саҕалаан ыыттылар. Түмэл икки саалатыгар былыргы биһиги өбүгэлэрбит таҥастара-саптара көрдөрүүгэ турдулар. Ону таһынан, кустук курдук куоһанан, таҥара табатын курдук симэнэн сахалыы аныгылыы таҥастары көрдөрдүлэр.
Ол курдук, дьоро киэһэни “Кырадаһын абылаҥа” түмсүү далбар хотуттара саҕалаатылар. Салайааччы СӨ норуотун маастара Дария Козлова. Мааныга кэтиллэр кыбытыылаах, кытыылаах соннору, дьабака бэргэһэлэри, мааны үтүлүктэри көрдөрдүлэр. Бу соннорго сукунаттан сахалыы кыбытан, аттаран тигии ньыматын киллэрбиттэр. Таҥастары өттүк симэҕэ ордук киэргэппит. Сукуна уонна жаккард матырыйаалларынан тикпиттэр.
Салгыы Таатта улууһуттан “Оһуордаах Таатта” айар мастарыскыай ыччакка анаан тикпит анылыгыы мааны таҥастарын – халадаай ырбаахы кэллиэксийэтин көрдөрдүлэр. Модельер Марианна Андросова.
Туйаара Александрова тикпит эр дьоҥҥо аналлаах сахалыы моһуоннаах көстүүмнэри эдэр уолаттар көрдөрдүлэр. Кэлиҥҥи кэмҥэ күүстээх аҥаардар саха таҥаһын кэтэр буолбуттара кэрэхсэбиллээх.
Салгыы 2012 сыллаахха Дьокуускай куоракка ыытыллыбыт Муода нэдиэлэтигэр “Саҥа саҕалааччыларга бастыҥ дизайнер” номинация хаһаайката, СӨ култууратын туйгуна Уруйдаана Харитонова моделлара киирдилэр.
Оттон Светалана Ивановна бэйэтин дойдутугар тэрийбит “Мааны эдьиийдэр” түмсүү далбар хотуттара таҕыстылар. Бу кэллиэксийэҕэ ордук атлаас матырыйаал уонна курууһуба, оҕуруо туттуллубут. Салайааччы Анна Андреева.
Салгыы лоскуйдартан тигиллибит сэлиэччиктэр кэллиэксийэтин көрдүбүт. Бу таҥастары ханна баҕар, үлэҕэ, уулуссаҕа кэтиэххэ сөп. Ааптар СӨ норуотун маастара Тамара Игнатьева.
Хаҥалас улууһун бастыҥ модельера Валериана Никифорова кэллиэксийэтигэр 20-с үйэ саҕаланыытынааҕы Хаҥаластан төрүттээх саха интеллигенциятын халадаайдарын, кэһиэччиктэрин, оноолоох соннорун көрдөрдүлэр.
Москуба куораттан Мария Розенблюм “Эко стиль” диэн кэллиэксийэтин көрдөрдө. Кэллиэксиэйэни тирии сыыстарыттан тигиллибит суумкалар ситэрдилэр.
Салгыы “Уран Саха” ювелирнай фирма дизайнера Ньургуйаана Филиппова айан таһаарбыт үрүҥ көмүс симэхтэрин көрдүбүт. Манна саха мааны симэхтэрин таһынан “Мисс Якутия”, “Мисс Евразия” куоҥкурустарга анаан оҥоһуллубут хоруоналар бааллар.
Бу курдук норуот маастарадара, иистэнньэҥнэр, дизайнердар Светалана Ивановна уонна “Уран иис” түмсүү 10 сыллаах үбүлүөйдэринэн бэйэлэрин үлэлэрин көрдөрдүлэр.
Светлана Ивановна бу дьоро күнүнэн модельер-худуоһунньук, М.К.Аммосов аатынан ХИФУ Педагогика институтун доцена, Арассыыйа худуоһунньуктарын Сойууһун чилиэнэ, СӨ Култууратын үтүөлээх үлэһитэ Августина Филипова эҕэрдэлээтэ уонна “Ситим” медиа-бөлөх таһаарбыт “Дар Богини Иэйиэхсит – 2020” диэн халандаарын бэлэх уунна.
