Ахсынньы 23 күнүгэр Дьокуускайга Саха циркэтин дьиэтигэр, Ил Дархан Харыйатыгар өрөспүүбүлүкэ араас муннугуттан 700-чэ бастыҥ үөрэнээччилэр: туйгун үөрэхтээхтэр, актыбыыстар, спортсменнар, араас олимпиадалар, научнай-практическай конференциялар, куоҥкурустар кыайыылаахтара муһуннулар.
Ил Дархан Айсен Николаев оҕолору кэлэн иһэр Саҥа дьылынан эҕэрдэлээтэ уонна баҕа санаатын эттэ: “Бүгүн манна бастыҥтан бастыҥнар мустан олороҕут. Олимпиадалар кыайыылаахтара, спортсменнар, ускуустубаҕа ситиһиилээх, дьону быыһаан хорсун быһыыны оҥорбут оҕолор уо.д.а. Эһиги үчүгэйдик үөрэннэххитинэ элбэҕи ситиһиэххит. Онон туохтан да толлон турбакка инникигит диэки эрэллээхтик хардыылаан иһэргитигэр баҕарабын”.
Ил Дархан Харыйатын кыттыылаахтара 25 тыһ солк стипендия ыллылар. Ону таһынан, “Арассыыйа эдэр лидерэ-2019” оҕо түмсүүлэрин лидердэрин бүтүн Арассыыйатааҕы куоҥкуруһун лауреата Алина Пшенникова, “Юнармия” бүтүн Арассыыйатааҕы байыаннай-патриотическай оҕо уопсастыбаннай хамсааһынын II истиэпэннээх хорсун быһыы бэлиэ хаһаайына Александр Андреев, “Роза ветров” норуоттар икки ардыларынааҕы тыйаатыр бэстибээл-куоҥкуруһун гран-при хаһаайына Евгения Тимофеева, греко-римскэй тустууга Европаҕа бастыыр иһин күрэхтэһии кыайыылааҕа Тимофей Стручков, ууга түспүт оҕону быыһаабыт Арслан Куличкин уо.д.а. Ил Дархантан бэлэхтэри туттулар.
Айсен Сергеевич кэргэнинээн оҕолору кытта “Щелкунчик и мышиный король” диэн Эрнст Теодор Амадей Гофман айымньытынан туруорууну көрдүлэр. Манна циркэ артыыстара, Аксения уонна Наталья Посельскайдар аатынан балет оскуолатын үөрэнээччилэрэ, Екатерина, Алексей Егоровтар устуудьуйаларын иитиллээччилэрэ, “Сюрприз”, “Серпантин”, “Три апельсина” үҥкүү кэллэктииптэрэ кыттыыны ыллылар. Туруорааччы-режиссер циркэ сүрүн режиссера, култуура туйгуна Мария Харлампьева-Попова.
Санатар буоллахха, Ил Дархан Харыйата 1998 сыллаахтан ыытыллар. Бу сыллар тухары 9-11 кылаас 14 тыһ үөрэнээччи кыттыбыт. Үгэс курдук киэҥ култуурунай бырагырааммаҕа сылдьаллар.
Холобур, быйыл “Арассыыйа – мин устуоруйам” историческай пааркаҕа, “Кванториум” оҕо технопааркатыгар, “Лена” киинэ тыйаатырыгар сырыттылар. Ону таһынан, Г.М. Кривошапко аатынан Саха сирин филармониятын кэнсиэрин көрдүлэр, М.К. Аммосов аатынан ХИФУ көрсүһүүлэргэ сырыттылар.
