Чочуллубут чороон курдук быһыылаах-таһаалаах Барби куукуланы 1959 сыллаахха айыахтарыттан ыла оросуобай өҥү кэрэ буолууну, баай-талым олоҕу, күлүмүрдэс кылабачыгас таҥаһы-сабы кытта дьүөрэлиибит. Оннооҕор гламурнай кыргыттарга анаан, кыһыл көмүскэ алтаны, үрүҥ көмүһү эбэн, сарсыардааҥҥы саһарҕаны санатар оросуобай көмүһү оҥорон таһаарбыттара. Бу матырыйаал бөҕөтүн ааһан, дьону абылыыр сиэдэрэй көстүүлээх. Оруобуна ол тэҥэ, продюсер Семен Ченянов, айылҕаттан куоластаах, кэрэ бэйэлээх кыргыттары талан ылан, “Arctic voice” устуудьуйатыгар биир ый устата дьарыктаан, “ROSE GOLD” диэн бөлөҕү тэрийдэ. Бу бөлөх кэрэчээн ырыаһыттарын кытта билсиэххэйиҥ эрэ.
Саргылана MАКСИМОВА-@sargulya_m:
– Аан дойдуга ураты өҥүнэн биллэр оруосабай көмүс курдук, барыларыттан атын, чаҕылхай, ханна да хатыламмат дьикти буолаары, “ROSE GOLD” диэн ааты ылбыппыт. Тоҕо эрэ: “Кэриэй ансаамбылларын курдук буолаҕыт дуо?” - диэн ыйыталлар. Суох, биһиги К-pop истиили тутуспаппыт, кими да үтүктүбэппит. Бэйэбит саҥалыы киэптээх, ураты тыыннаах, саха эстрадатыгар сонун сүүрээни киллэрэр, аныгылыы тэтимнээх ырыалары толорор бөлөх буолуохпут.
Биһигини 50 кыыстан сүүмэрдээн ылбыттара: куоласпытын истэн, быһыыбытын-таһаабытын, тас көрүҥмүтүн көрөн, үнкүүлүүрбүтүн бэрэбиэркэлээн, абылыыр айылгыбытын (харизмабытын) сыаналаан. Саамай кылаабынайа, хамаанданан үлэлииргэ бэлэм буолуохтаах этибит: эйэлээх, дьону кытта тапсар, биир тылы булар, эйэҕэс-сайаҕас, эппиэтинэстээх. Кырдьыга да, иллээх буоллахпытына эрэ биир санаанан айымньылаахтык үлэлиир буоллахпыт.
Сүүмэрдээһин кэнниттэн биир ый устата Семен Ченянов устуудьуйатыгар стажировкаламмыппыт. Биһигини кытта стилистэр, модельердизайнердар, психологтар, фотографтар үлэлэспиттэрэ. Семен Павлович ырыабытын, “Snow voice” солиһа Михаил Кычкин хамсаныыларбытын үөрэппитэ.
Бэйэм туспунан кэпсээтэххэ, 2016 сыллаахха Нам улуустааҕы гимназиятын кыһыл көмүс мэтээлинэн бүтэрэн, Хотугулуу-Илиҥҥифедеральнай университет Үп-экэниэмикэ институтугар “финансы и кредит” диэн салаатыгар киирбитим. Билигин IV куурус устудьуонабын. Быйыл бүтэрэбин уонна салгыы магистратураҕа үөрэнэ хаалыам. Былырыын саас «Мисс СВФУ-2019» кыайыылааҕа буолбутум.
Ырыа диэн хоббим, 7 сааспыттан арахсыспат аргыһым. Оскуолабыт “Дьэргэлгэн” ансаамбылыгар сылдьарым. “Хотугу сулус” куонкуруска лауреат, Гран-при буоларбыт, Санкт-Петербурга тиийэ күрэхтэһэрбит. Итини таһынан, өссө муусука оскуолатын үҥкүү кылааһыгар дьарыктаммытым. Спорду эмиэ сэҥээрэрим: сүүрэрим уонна волейболлуурум. Уопсайынан, наһаа көхтөөх оҕо этим. Туох баар НПК-ларга, ааҕыыларга, “Будущий дипломат” дьыалабыай оонньууга кыттарым. Үрдүк да үөрэххэ актыбыыскабын. Устудьуоннар идэлээх сойуустарыгар үлэлэһэбин.
Айталыына Алексеева- @а.айа1уупа:
– Мин бу бөлөх саамай “саастаахтара” буолабын - сүүрбэ түөрдүм. Оҕо эрдэхпиттэн баччааҥҥа диэри иитиэхтээн кэлбит баҕа санаабын толороору, бүтэһик 50-с киһинэн кастинна кэлэн, бары түһүмэхтэри этэнҥэ ааһан, “ROSE GOLD” бөлөх ырыаһыта буоллум.
Горнай улууһун Бэрдьигэстээх С.П. Данилов аатынан оскуолатын бүтэрбитим. Начаалынай кылаастарга учууталым Лия Алексеевна тэтэрээт бэрэбиэркэлиирин, сыана туруорарын ымсыыра көрөрүм, ол иһин пединститукка туттарса кэлбитим. Ол гынан баран, алын сүһүөх кылаас учууталын үөрэҕэр куонкурус наһаа улахан буолан, логопед идэтигэр үөрэнэ киирбитим.
Билигин үһүс сылбын Маҕан дьыссаатыгар үлэлиибин. Күн аайы куораттан 102-с нүөмэрдээх оптуобуһунан айаннаан барабын. Эбиэттэн киэһэ иллэҥмин, тугунан эмэ дьарыктанар баҕалааҕым. Хата, билигин бу бөлөххө киирэммин, күнүм биллибэккэ ааһар.
Быыкаайык эрдэхпиттэн ыллыыбын. Онтон алтыс кылаастан “Көмүс далаһа” оҕо эстраднай-муусукалынай устуудьуйатыгар сылдьыбытым, Карл Кононович Сидоровка дьарыктаммытым. Литваҕа, Великэй Новгородка, Казахстаҥҥа ыытыллыбыт куонкурустарга ситиһиилээхтик кыттыбытым. Өрөспүүбүлүкэҕэ биллэр ырыаһыт буолуохпун баҕарар этим. Ол баҕа санаабын, дьэ, толорон эрэрбиттэн үөрэбин...
Сардаана Харитонова- @_hattalya:
– Кастиҥҥа кэлбит 50 кыыстан Бэрдьигэстээх“Көмүс далаһа” устуудьуйатыгар дьарыктаммыт икки кыыс бу “ROSE GOLD” бөлөххө талыллан киирбиппит улахан чиэс, Карл Кононович сыралаах үлэтин түмүгэдии саныыбын. Кини көҕүлээн, устуудьуйаны бүтэрэрбэр, ити аата IX кылааска, нэһилиэнньэҕэ айар киэһэбин тэрийбитим. Бэлэмнэнии, долгуйуу бөҕө этэ. Оннук отчуоттуур кэнсиэри көрдөрөр оҕоҕо улахан үөрүйэҕи, уопуту биэрэр эбит - репертуары оҥороргуттан саҕалаан, балтараа чаас устата көрөөччүнү салгыппат гына сэргэхтик сценарийдаан ыыттараргар тиийэ барытан бэйэҥ тэҥҥэ толкуйдаһаҕын, идиэйэлэргин киллэрэҕин, дьиҥнээх артыыс курдук сананаҕын. Оскуола сылларыгар Карл Кононович аҕам тэҥэ чугас киһим этэ. Оттон билигин Семен Павлович аҕабыт буолла. Ирдэбиллээх, хойутууру энин сөбүлээбэт. Мин оскуоланы быйыл бүтэрбитим. Саха салаатын I кууруһугар үөрэнэбин.
Оҕо сылдьан бастаан уруһуй куруһуогар сылдьыбытым. Уу чуумпутук олорон ойуулуурбут, оттон кылааспыт утары турар аантан ырыа-тойук бөҕө дьиэрэйэрэ. Санаабар, бэһиэлэй, көрдөөх баҕайытык үөрэнэр курдуктара, ымсыыра саныырым. Биирдэ харсасуохпун киллэрэн, ол аптаах ааммын тоҥсуйбутум. Карл Кононович арыйбыта, киниэхэ ыллыахпын баҕарарым туһунан эппитим. Онтон ыла уруһуйбун быраҕан, аны ырыаһыт буолбутум.
Кристина ШАДРИНА-@shadrinakristi:
– Мин араас көрүҥҥэ барытыгар холонон көрбүтүм.Уруһуйга, ырыаҕа, скрипкаҕа, барабаан охсорго... Барытыгар да син ситиһиилээх этим да, улаханнык сэҥээрбэккэ, быраҕан иһэрим. Онтон хипхоп хайысханан үлүһүйэн, 4 сыл устата “Dance Generation» үҥкүүлээбитим. Дьиҥэр, сыалым- соругум олох атын этэ - түргэнник үлэһит буолан, бэйэм харчы өлөрөр диэн. Ол иһин 35-с оскуоланы IX кылаас кэнниттэн бүтэрбитим уонна Үп- экэниэмикэ И.И. Фадеев аатынан кэллиэһигэр буҕаалтыр идэтигэр үөрэнэ киирбитим. Быйыл бүтэрэбин.
Семен Ченянов “Arctic voice” айар устуудьуйатыгар урут эмиэ дьарыктана сылдьыбытым. Онтон алтынньы 5 күнүгэр Инстаграмыгар биллэрии таһаарбытын көрөн, холонон көрөргө санаммытым.
Сааспынан саамай кыралара буолабын. Төрдүөн олус доҕордуубут. Бу сыл олох күүскэ үлэлиэхтээхпит, ааппытын оҥостуохтаахпыт. Тэриллибиппит түөрт эрэ ый буолла да, номнуо хас да хит ырыаны таһааран, элбэх сиргэ кэнсиэрдээн, үлэ бөҕө буола сылдьабыт. Былаан киэҥ, сыал-сорук улахан.
Кэпсэттэ Анисия ИЕВЛЕВА
