Бүгүн, муус устар 6 күнүгэр биир дойдулаахпыт, норуот тапталлаах ырыаһыта Раиса Яковлевна Захарова төрөөбүт күнүгэр, кинини ахтан, аатыгар сүгүрүйэн ааһарбыт тоҕоостоох.
Кэм-кэрдии тохтообот. Бириэмэ биир кэм субуллан иһэр. Дьылҕа хаан киниэхэ анаабыт олоҕо төһө да кылгас буоллар, кини сирдээҕи олоҕор сахалыы ырыа сайдарын туһугар дьоһун кылаатын киллэрбитэ. Айылҕаттан бэриллибит талааннаах, дьон-сэргэ сөбүлээн истэр норуот ырыаһыта буолбута. Өрөспүүбүлүкэ дьоно-сэргэтэ, ырыаны сэргээччилэр хатыламмат күүстээх, киэҥ диапазоннаах куолаһын күн бүгүҥҥэ диэри астына-дуоһуйа истэллэр.
Биһиги Раисабыт ыллаан хаалларбыт ырыалара өрүү норуот өйүгэр-санаатыгар баар буолуохтара. Үтүө аата куруук ааттана туруо.
Бүгүн, оҕо сааһын доҕоро, РФ үөрэҕириитин Бочуоттаах үлэһитэ, СӨ үөрэҕириитин туйгуна Татьяна Березина, "Ырыаһыттар аллеяларыгар" Раиса Захарова анал ыскамыайкатыгар, кинини ахтан-санаан туран сибэкки дьөрбөтүн уурда. Билиҥҥи дьон “самоизоляцияҕа” олорор кэмигэр, "Зеленый рай" сибэкки маҕаһыына анаан-минээн сибэкки дьөрбөтүн оҥорон биэрбитигэр, маҕаһыын кэллэктиибигэр махталбытын тиэрдэбит.
"Горнай түмсүү" уопсастыбаннай тэрилтэ пресс-сулууспата.