РСФСР култууратын үтүөлээх үлэһитэ, Саха АССР ускуустубатын үтүөлээх диэйэтэлэ, Үлэ Кыһыл Знамятын уорддьанын кавалера, норуот ырыаһыта, саха дьолугар сэдэххэ төрөөн ааспыт Сергей Афанасьевич Зверев – Кыыл Уолун күнүн Сунтаар улууһугар бэлиэтииллэр.
2018 сыллаахха Сунтаар улууһун дьокутааттарын Сэбиэтин бэһис ыҥырыылаах мунньаҕа бэс ыйын 8 күнүгэр 49-с уочараттаах сессиятыгар ахсыс нүөмэрдээх быһаарыытынан, муус устар 9 күнүн – Кыыл Уолун күнэ диэн быһаарыныы ылыммыт. 1948 сыллаахха, муус устар 9 кунугэр Сергей Зверев аан бастакы улахан наҕараадатын Үрдүкү Сэбиэт Президиумуттан бочуотунай грамота тутан дьолломмут. Бу суолталаах күнү Сергей Зверев биир дойдулаахтара “саха норуотун ааттатар сүдү киһибит күнэ” диэн 2019 сылтан бэлиэтииллэр.
Ытыктабыллаах Сахабыт сирин дьоно!
Сергей Афанасьевич Зверев – Кыыл Уолун – норуот култууратын айааччытын аатын, кини айар нэһилиэстибэтин чөлүгэр хаалларыыга, көлүөнэлэри гражданскай-патриотическай санааҕа иитиигэ, норуот үгэстэрин сайыннарыыга, духуобунай сыаннастарын өрө тутууга, ону тэҥэ Арассыыйа бары норуоттарын түмсүүлэригэр уонна сомоҕолоһууларыгар көмөлөһөр саха норуотун култууратын феноменын курдук көрөн, аатын үйэтитэр сыалтан – улууспутугар муус устар 9 күнэ СИБИЭРЭП КҮНЭ диэн биллэриллибитэ!
Аан дойду биир да омугар суох, аҥардас биһиэхэ, сахаларга эрэ баар Зверевтии тардыылаах тойукпут, бэйэтэ олоҥхоҕо тэҥнээх Зверевтии таҥыылаах оһуохайбыт уратыларын, "Ытык дабатыытын”, поэмаларын, үҥкүүлэрин, музыкатын уонна фольклорга хаалларбыт нэһилиэстибэтин хойукку ыччат хоһоон гыныа, кэнчээри ыччат кэпсээн гыныа, үүнэр үйэлэр үөрэхтээхтэрэ чинчийиэхтэрэ турдаҕа. КЫЫЛ УОЛУН КҮНҮНЭН ЭҔЭРДЭ!
Сунтаар улууһун баһылыга Анатолий ГРИГОРЬЕВ,
Улуус дьокутааттарын Сэбиэтин бэрэссэдээтэлэ Ульяна ПОПОВА
Улуус баһылыгын социальнай уонна имиджевай бэлиитикэҕэ солбуйааччы Гаврил ЕРЕМЕЕВ
Сунтаар улууһун култууратын уонна айылгытын салалтатын салайааччыта Мария КОБЕЛЬЯНОВА - ТУСКУЛААНА
Муус устар 9 күнэ, 2020 сыл.
