Бу – Олоҥхо дойдутунан аатырбыт Сунтаар айылгытын кэрэһэлиир, аар-сааргы аатырдар Киин буолуоҕа. Маннык сүдү, сиэдэрэй тутуу, билиҥҥитэ, ханнык да улууска суох. Онон, сунтаардары кытары олук үктэһэн, дойду-дойду аайы, маннык норуот айымньытын Кииннэрэ дьэндэйиэхтэрэ диэн эрэл баар.
Бу тутууну Сунтаар чаҕылхай уола Матвей Евсеев салайар «Арктик-Капитал» уонна Сунтаар улууһун үбүгэр-харчытыгар олоҕуран дьэндэтиллэр. 350 миэстэлээх дьиҥнээх дыбарыас сүрдээх эгэлгэ, эриэккэс моһуоннаах буолбут. Ол курдук өргөстөөх, биир тэҥҥэ дэхси тутуллубут быһыыта, кэрэмэн оһуордаах-мандардаах, тас өттө дьону ыраахтан угуйар, сэргэҕэлэтэр. Бу тутууну Сунтаар оройуона быйыл түмүктүүр соруктаах эбит. Билиҥҥитэ тутуу ис өттүн үлэлэрэ бара тураллар. Сунтаардар Киин үлэҕэ киириитин олус диэн күүтэллэр. Оччотугар сотору бу Киин иһигэр сарылы тыктарбыт тэҥэ норуот айымньыта сайдыаҕа-силигилиэҕэ, этигэн хомус дьүрүһүйүө, экчи-бааччы эһиэкэй эйэҕэстик эйээриэ, оһуохай дьиэрэйиэ, сайаҕас санаалаах мустуо.
Станислав Алексеев, Мииринэй куората. Ааптар хаартыската.
