Кулун тутар 24 күнүгэр талыы-талба дьоннордоох Ытык Таатта сиригэр — Алдан нэһилиэгэр биир дойдулаахпыт, тойуксут, алгысчыт, оһуохайдьыт, олоҥхону толорооччу, тыыл, үлэ ветерана, "СӨ фольклорун сайдыытыгар үтүөлэрин иһин" анал бэлиэ хаһаайына, Алдан нэһилиэгин Бочуоттаах олохтооҕо Михаил Иванов аатынан улуустааҕы оһуохайдьыттар күөн күрэстэрэ бэрт үрдүк таһымнаахтык буолан ааста. Тэрээһиҥҥэ Саха сиринээҕи "Оһуокай" түмсүүттэн "СӨ Дархан этээччитэ", Таатта улууһун оһуохайга куратора Хорунов Валентин Васильевич, "СӨ Үтүөлээх этээччитэ" Семен Алексеев сырыттылар. Күрэхпитигэр сэттэ нэһилиэктэн 26 оһуохайы таһаарааччылар, кынаттар кэлэннэр өбүгэбит үҥкүүтүн өрө тутаннар түөлбэ күөллүү төгүрүйэ сылдьан оһуохайдаатылар.
Оҕолорго дьүүллүүр сүбэҕэ олордулар: Михаил Иванович оҕото – Михаил Иванов, “Кытыл” норуот айымньытын дьиэтин дириэктэрэ Варвара Максимова, Таатта улууһун фольклорга сүрүннүүр специалиһа Майя Егорова. Кэнчээри ыччаттарга икки бөлөҕүнэн 6 оҕо кытынна. Улахан дьоҥҥо дьүүллээтилэр — Күөх Ньурбаттан кэлбит Михаил Иванович сиэн балта Маргарита Иванова, Н.Д. Неустроев аатынан Уус Таатта орто оскуолатын саха тылын уонна литературатын учууталлара Евдокия Неустроева, Розабелла Попова. Бу дьоро түһүлгэҕэ Таатта улууһуттан 7 нэһилиэктэн улахан дьоҥҥо 20 оһуохайдьыт саастарынан түөрт бөлөххө арахсан илин-кэлин түһүстүлэр.
Ону тэҥэ Михаил Иванович олоҕун, айар үлэтин, дэгиттэр талаанын сырдатар “Аҕабыт сырдык кэриэһигэр” кинигэ уонна дискэ сүрэхтэниитэ буолла. Михаил Иванович оҕолоро Ринна Михайловна, дьоллоох Дьокуускайтан Жанна Михайловна, Михаил Михайлович, Хаандыгаттан сиэнэ Николай Макаров кэргэнинээн кэлэн күндү киһилэрин сырдык аатын үйэтитээри көхтөөх кыттыыны ыллылар.
Дьүүллүүр сүбэ уопсай сүбэтинэн “Таатта улууһун Дархан этээччитэ” үрдүк ааты СӨ Үтүөлээх этээччитэ Иван Иванов (Ытык Күөл) ылла уонна Михаил Иванович оҕолоро туруорбут бирииһинэн наҕараадаланна. Биирдиилээн оҕолорго, ыччаттарга “Оһуокай” түмсүүттэн харчынан бириэмийэ, сыаналаах бириистэр туттарылыннылар. Нэһилиэк, улуус тэрилтэлэрэ, биирдиилээн дьон эмиэ сыаналаах бириистэри туруоран көмөлөстүлэр.
Уус Тааттаҕа бастакытын ыытыллыбыт улуустааҕы күрэхпит бэрт таһаарыылаахтык, үрдүк таһымнаахтык ааста. Бары спонсордарбытыгар, куруутун күүс-көмө буолар, оһуохай сайдыытыгар бэйэлэрин кылааттарын киллэрэр “Оһуокай” түмсүү салайааччытыгар Александр Даниловка, Александр Тарскайга, Валентин Хоруновка, Семен Алексеевка, Таатта улууһун култуураҕа уонна духуобунаска салаатыгар (начаалынньык Афанасий Лопатин) уо.д.а. барҕа махталбын тиэрдэбин. Байанайдаах дьон буолуҥ, аллараттан аргыар аргыйбатын, үөһэттэн үргүөр үргүйбэтин диэн алгыс тылбын анаатаҕым буолуохтун, сыралаах үлэҕит өрүү сыаналана турдун диэн баҕа санаабын этэбин!
Айта Васильева, Уус Тааттатааҕы оҕо ускуустубатын оскуолатын уһуйааччы
