Киирии

Киирии

Соторутааҕыта Д.Ф. Ходулов аатынан народнай театрга Майатааҕы Аркадий Новиков «Көөчөөн көрө» мини-театра көҕүлээн тэрийбит «Сааскы сирэйдэр» өрөспүүбүлүкэтээҕи көр-күлүү аһаҕас ΧΙ бэстибээлэ киэҥ далааһыннаахтык ааста. Бу күрэскэ 130 киһи кытынна, 22 кэлэктиип уопсайа 65 нүөмэри көрдөрдө.

“Аркадий Михайлович Новиков ааптар, артыыс, режиссер, худуоһунньук буоларын быһыытынан, кини курдук дэгиттэр талааннаах киһини көрдөөн сайыннарар сыаллаах «Сааскы сирэйдэр» бэстибээлбитигэр сылын аайы доҕотторбутун күүтэбит”, – диэн бэйэтин санаатын тэрийээччи Анна Охлопкова үллэстэр.

«Көөчөөн көрө» мини-театр артыыстара «Күһүҥҥү, кыһыҥҥы, сааскы күллэрэҥнэр» бэйэлэрин былааннарыгар киллэрэн улуустары кэрийэ сылдьан айар талааннаах дьоннору түмэн үөрэтэн, сүбэ-ама биэрэн кыттааччылар таһымнара, толорор маастарыстыбалара үрдээбит, көстүүмнэригэр болҕомто уурбуттара харахха быраҕыллар. Дьүүллүүр сүбэҕэ СӨ үтүөлээх артыыһа, поэт, суруйааччы Елена Слепцова-Куорсуннаах бэйэтинэн кыттыспыта, ону таһынан Аркадий Новиков үөрэппит, такайбыт үөрэнээччилэрэ олорбуттара бэстибээл таһымын үрдэтэн биэрдэ.

1

Уус Алдан Чараҥ бөһүөлэгиттэн сылдьар Евдокия Окоемова «Дьирибинэ» бөлөх салайааччыта «сценкаҕа саҥа холонон эрэбин, урут наар оҕо киинэтин устар этибит, 33 тэттик киинэлээхпит “Ералашка”, баҕар НВК көрбүккүт буолуо, бу бэстибээлгэ саҥа кытынныбыт, тэрээһинэ үчүгэй, атын “сааскы сирэйдэри” көрөн сэргэхсийии, сайдыы бөҕө буолан кэллибит, ситиһиилээхтик кыттан, Чараҥ дьоно-сэргэтэ үөрүү бөҕө, бэйэбит дьоммутугар кэнсиэр көрдөрүөхтээхпит» - диэн баҕа санаатын этэр.

3

Таатта Уолбатыттан сылдьар эдэр режиссер Петр Чахов бөлөҕө саҥа кытынна. Кини атын хас да эмэ сыл супту кыттыбыт норуот артыыстарын көрөн бэйэтин итэҕэһин аһаҕастык билиннэ: “Дьон үлэлиир да эбит, мөлтөх да эбиппит, мин тиһэҕэр толкуйдаабатахпын”, – диэбитин сэргии санаатым. Ити – үлэлиэх, айыах-тутуох режиссер саҥата.

2

Бэстибээл Кылаан бирииһин Аркадий Новиков төрөппүт оҕолоро туруорбут видеокамераларын дьүүллүүр сүбэ биир санаанан Горнай улууһун Бэрдигэстээҕиттэн сылдьар «Пилоты» нүөмэрэ ылла. Бирииһи салайааччы Кирилл Дьяконов туттарда. Лауреаттарынан Үөһээ Бүлүүттэн «Хоросо», Амма Абаҕатыттан «Айтал»(салайааччы Евгения Попова) уонна «Дьиибэ-дьээбэ хомпулар» (салайааччы Сардана Сергеева) уонна Мэҥэ Хаҥалас Тиэлигилэрэ ааттаннылар. Бастакы истиэпэннээх диплом Кэрдэм народнай театрыгар, иккис истиэпэннээх диплом Уус Алдан Чараҥыттан «Дьирибинэ» бөлөххө (салайааччы Евдокия Окоемова), үһүс истиэпэннээх диплом Таатта Чымнаайытыттан сылдьар «Сайдар» бөлөххө (салайааччы Соломон Николаев) тигистилэр.

Аныгыскы бэстибээлгэ эрдэттэн бэлэмнэнэн, бастыҥнар кэккэлэригэр киирсэр гына кэлээриҥ, көрү-күлүүнү оройуттан туппут бэрт бэтиэхэлээхтэрбит!

Любовь Шишигина-Сыралыма

Тарҕат:

Ырытыыгын суруй

Защитный код
Обновить