Гуманитарнай чинчийэр институт үлэһиттэрэ В.Б. Игнатьева уонна Н.И. Бурнашева социальнай-бэлитиичискэй история Арассыыйатааҕы архыыбыгар урут көстүбэтэх М.К Аммосов И.В. Сталиҥҥа суруйбут суругун буллулар. Бу туһунан Национальнай бибилэтиэкэ пресс-сулууспата суруйар.
Бу суругу соторутааҕыта чып кистэлэҥҥэ сылдьыбыт И.В.Сталин архыыбын арыйыы кэмигэр булбуттар. Ити сурук туһунан чинчийээччилэр “Вестник РУДН. Серия: История России” билим сурунаалын анал нүөмэригэр “М.К.Аммосов: из плеяды национальных лидеров раннесоветской эпохи” диэн кыттыгас ыстатыйаны суруйбуттар.
Максим Аммосов – саха чулуу уола, биллэр сэбиэскэй судаарыстыбаннай уонна партийнай деятель, Сибииргэ сэбиэскэй былаас олохтонуутугар күүскэ кыттыбыта. Кини Саха сиригэр, Киргизияҕа уонна Казахстаҥҥа өрөбөлүүссүйэ уларыйыылара киирэригэр уонна социалистическэй экэниэмикэ олохтоноругар олоҕун толук уурбута.
