СӨ Култуураҕа уонна духуобунай сайдыыга министиэристибэтэ иһитиннэрэринэн, ахсынньыттан саҕалаан өрөспүүбүлүкэ тыйаатырдара үлэлиэхтэрэ, дьон-сэргэ ахтылҕаннаах испэктээктэрин, саҥа дьыллааҕы дьүһүйүүлэри көрүөхтэрэ. Ол гынан баран, тыйаатыры үлэлэтэри-суоҕу дириэктэр бэйэтэ быһаарар буолуоҕа.
Бу күннэргэ министиэристибэ култуура тэрилтэлэрин Роспотребнадзор ирдэбиллэрин тутуһалларын-суоҕун бэрэбиэркэлээтэ.
“Тэрилтэлэргэ илиини ыраастыыр дезинфектордар, тэмпэрэтиирэни кэмниир прибордар, сирэй мааскалара, бэрчээккилэр, фойеларга, көрөөччү саалаларыгар салгыны ыраастыыр рециркулятордар бааллар, билиэттэри дьону кытта сирэй көрсүбэккэ атыылаһыахха сөп. Уопсайынан, тэрилтэлэр дьону-сэргэни көрсөргө бары бэлэмнэр”, -- диэн министиэристибэ пресс-сулууспата суруйар.
Тэрээһин кэмигэр саалалары 50 % эрэ толоруохтара. Дистанцияны тутуһуу булгуччулаах буолуоҕа.
Бүгүҥҥү туругунан, Нерюнгрига Куукула тыйаатыра уонна Дьокуускайга Эстрада тыйаатыра үлэлээн эрэллэр. Саха уонна Нуучча тыйаатырдара 24-25 чыыһылалартан саҕалаан арыллыахтара. Ити күннэргэ хайаларыгар даҕаны премьерэ буолара күүтүллэр.
