Маай бырааһынньыктарын оҕолоргутун, сиэннэргитин кытары астына-дуоһуйа, туһалаахтык атаарыҥ! Ыам ыйын 6 күнүгэр Өксөкүлээх Өлөксөй аатынан Норуоттар доҕордоһууларын дьиэтигэр “Сардаана сибэкки” диэн оҕолорго аналлаах остуоруйа-мюзиклга ыҥыраллар!
Бу аан бастакы идэлээх дьон туруорбут оҕо мюзиклын Дмитрий Наумов остуоруйатынан туруордулар. Мюзикл ырыатын тылларын поэтесса Саргылаана Гольдерова суруйбут. Ырыалары Алексей Егоров уонна кини уолаттара – Өркөн уонна Харысхан суруйдулар. Доҕуһуолга, муусуканан киэргэтиигэ Лэкиэс, Михаил Кобяков, Серафим уонна Харысхан үлэлээтилэр. Үҥкүүнү “Сандал” оҕо образцовай үҥкүү кэлэктиибин салайааччыта Сардаана Катакова туруорда. Сценографияны Саха театрын кылаабынай худуоһунньуга Михаил Егоров оҥордо. Анаан-минээн 70-тан тахса дьэрэкээн көстүүм тигиллибит. Дизайнер – Изабелла Кузьмина.
Мюзиклы туруорарга айар бөлөх 3 өрөспүүбүлүкэ гранын сүүйбүт. Премьера бу күһүн буолбута, икки испиктээк ытыс тыаһынан, үрдүк таһымнаахтык ааспыта.
Көрөөччү кутун туппут мюзикл ыам ыйын 6 күнүгэр үһүстээн туруоҕа. Түгэни куоттарымаҥ! Киирии билиэт сыаната 250 солк. Билиэт куорат бары каассаларыгар, итиэннэ Tesserus.com саайка атыыланар. Мюзикл 16 ч. саҕаланар.
