Киирии

Киирии

Мииринэйгэ Кыайыы күнүгэр Ленин болуоссатыгар мустубут саха дьоно Улуу Кыайыыны уруйдаан оһуокайдаан ойдулар. Быйылгы Кыайыы оһуокайыгар хаһааҥҥытааҕар да элбэх киһи тоҕуоруста.

Оhуокай тылларын ордук дуорааннаахтык Арыылаах сэлиэнньэтиттэн анаан-минээн кэлбит Владимир Семенов-Арыылаах Болуодьата табыллан эттэ.

mir1

81 саастаах Владимир Сэмэнэп олоххо сүрдээх кимиилээх быhыылаах-майгылаах киhи. 51 сыл анараа өттүгэр Бүлүү муоратыгар тимирдилибит Туой Хайа сэлиэнньэтиттэн төрүттээх. Үйэтин-сааһын тухары «Новай» сопхуоска тигинэччи үлэлээн кэллэ. Ааттаах отчут, сылгыhыт. Атын мииннэ да ыллаабытынан-туойбутунан барар. Владимир Сэмэнэп улууска тарбахха баттанар үҥкүү тылын этээччи, оһуокайы өрө тутааччы. Ыллыыр ырыата уhуна, этигэн тылын урана, чахчы да уран куттаах, дьоhун оhуокайдьыт. Араас улуус дьонугар Садын сахаларын ырыаларын-тойуктарын ыкса билиhиннэриигэ далааhыннаахтык үлэлээтэ.

mir2

Сүрүннээн нуучча дьоно олорор Мииринэй оройуонун аатыттан, Сунтаар, Ньурба тунах ыhыахтарыгар оhуокай тылын кэрээбэккэ чоргуйан, улахан түhүлгэлэри мунньуталаан, аатырыан аатырбыта. Yгүстүк биhирэммитэ, аата-суола ааттаммыта. Арыылаах Болуодьата «hадынныы», урут Туой Хайатын, кэрэ Чуонатын кырдалларыгар ыллыыр ньымаларын илдьэ сылдьар.

mir3

Саха дьоно ырыа-тойук куттаахпыт. Yчүгэй ырыаттан чэччийэр, санаабыт эгдийэр чараас эйгэлээхпит.

mir4

Онон, Кыайыы оhуокайыгар кыттыспыт дьон – устудьуоннар, оробуочай кылаас ыччата, бэтэрээннэр быардара манньыйда, сүрэхтэрэ сылаанньыйда.    

mir5                

Олохтоох сахалар маннык түмсүүлэрэ саха норуотун былыргы үгэстэрин араас омуктарга быhаччы тириэрдэрэ саарбахтаммат.

mir7

Быйыл аан бастаан атын омуктар оhуокайбытыгар кытыннылар.

mir5

Мантан ситимнэнэн сахалыы тылы, кэрэ эйгэни сэргээччилэр элбиэхтэрэ диэн эрэл баар.

Станислав Алексеев, Мииринэй куорат. Ааптар хаартыскалара.

 

 

Тарҕат:

Ырытыы  

Саха
+6 Саха 10.05.2018 11:12
Мииринэйгэ сахалар элбээбиттэр. Бэрт эбит. Маладьыастар!
Ответить
Бэтинчэ
+3 Бэтинчэ 10.05.2018 19:34
О5олор барахсаттар...
Ответить

Ырытыыгын суруй

Защитный код
Обновить