Куорат баһылыга Сардаана Авксентьева сорудаҕынан, муус устар 1 күнүттэн куорат таһыгар сүүрэр оптуобустар төлөбүрдэрэ түһэр.
Баһылыгы солбуйааччы Михаил Воробьев бэлиэтииринэн, ааспыт сыллаахха экономика департаменыгар уонна “ЯПАК” тэрилтэҕэ саҥа тарыыбы киллэрииги улахан үлэ ыытыллыбыт. “Икки ый иһигэр биир тарыыбы оҥорууга элбэх барыйааны көрдүбүт. Уонна олохтоохторго ордук табыгастааҕар тохтоотубут”, — диэн Михаил Воробьев этэр.
Оттон “ЯПАК” дириэктэрэ Сергей Максимов саҥаны олохтооһун көмөтүнэн тарыып түһэрин бэлиэтиир. “Куорат таһыгар айан уу харчынан 60 солк, “Спутник” айан хаартанан – 51 солк буолуоҕа. Саҥа тарыып айан хаачыстыбатыгар охсуо суоҕа”, – диэн этэр.
Бу күҥҥэ төлөбүрү “Спутник” айан хаартанан төлүүр ордук табыгастаах. Куорат иһигэр эмиэ туттуллар, болдьоҕо суох. Төлөпүөн сыһыарыытын нөҥүө харчы угуохха сөп.
Ону таһынан, куорат таһыгар сылдьар оптуобустарга электроннай хаарта киириэҕэ. Сыаната 2500 солк. тэҥнэһиэ. Бу хаарта биир ый болдьохтоох буолуоҕа. Ый иһигэр төһө баҕар туттуохха сөп. “ЯПАК” оптуобустарынан нэһилиэнньэлээх пуун иһигэр уу харчынан 28 солк, оттон хаартанан – 25 солк тэҥнэһиэ. Социальнай хаартанан льготалар уруккунан хаалыахтара. Билигин куорат таһыгар 31 оптуобус сүүрэр. Бу туһанан СМИни кытта үлэлиир департамент иһитиннэрэр.
