Киирии

Киирии

Кулун тутар 27 күнүгэр Дьокуускайдааҕы 25-с №-дээх орто оскуола саҥа дьиэтин үөрүүлээх аһыллыыта буолан ааста. Тэрээһиҥҥэ Ил Дархан Айсен Николаев, баһылык Сардаана Авксентьева, оскуола дириэктэрэ Иван Захаров, “ГазЭнергоМонтаж” ХЭТ Саха сиринээҕи салаатын начаалынньыга Андрей Урум уонна оскуола кэллэктиибэ, үөрэнээччилэр, төрөппүттэр кыттыыны ыллылар.

350 миэстэлээх саҥа оскуола үөрэххэ туттуллар аныгы тэрилинэн толору хааччыллыбыт. Бу туһунан Мэрия пресс-сулууспата иһитиннэрэр.

Ил Дархан   Айсен Николаев оскуола кэллэктиибин эҕэрдэлээтэ уонна маннык эттэ: “Бүгүн биһиги куорат биир ордук тупсаҕай тутуулаах дьиэтин аанын арыйдыбыт. Аныгы ирдэбилгэ толору эппиэттиир саҥа оскуолаҕа оҕолор хаачыстыбалаах үөрэҕи ылан бастыҥ испэсэлиис буолан тахсыахтара диэммин эрэнэбин”.

Куорат баһылыга    Сардана Авксентьева киэҥ-куоҥ, сырдык оскуолаҕа оҕолор бары өттүнэн сайдыылаах буолалларыгар усулуобуйа тэриллибитин бэлиэтээтэ: “Маннык тэтиминэн сотору кэминэн куоракка биир да мас оскуола суох буолуоҕа. Бу киһини олус үөрдэр”.

Бэлиэ күлүүһү “ГазЭнергоМонтаж” ХЭТ Саха сиринээҕи салаатын начаалынньыга Андрей Урум оскуола дириэктэригэр Иван Захарвка   туттарда уонна эттэ: “Бу “ВИС” бөлөх судаарыстыбаннай-чааһынай үлэҕэ ордук бөдөҥ социальнай бырайыага буолар. Биһиги үлэбитин болдьох иһигэр үрдүк хаачыстыбалаахтык тутан бүтэрдибит. Саҥа оскуолаҕа ситиһиилээх үөрэҕи, үлэни баҕарабын”.

Оскуола дириэктэрэ Иван Захаров “Норуот бүддьүөтэ” бырайыак көмөтүнэн бу күһүн оскуола баазатын иһинэн успуорт саалата тутулларын бэлиэтээтэ: “Бу бырайыак Сайсары уокуругар анаан олоххо киириэ. Оҕолор успуорт үгүс көрүҥнэригэр эрчиллэр кыахтаныахтара. Онон сотору кэминэн түөрт дьиэлээх бүтүн комплекс баар буолуоҕа”.

Оскуола саҥа дьиэтэ үөрэнэр кылаастары таһынан киэҥ-куоҥ ааҕар сааллаах библиотекэлээх, успуорт уонна аактабай саалалардаах. Нуучча уонна аҕыйах ахсааннаах норуоттар култуураларын үөрэтэр кылаастар, көмпүүтэр кылааһа, ону таһынан, начаалынай байыаннай бэлэмнэнии кэбиниэтэ баар.

Санатан этэххэ, тутуу сыбаайата икки сыл аннараа өттүгэр, 2017 сыл кулун тутар ыйыгар түспүтэ. 1962 сыллаахха тутуллубут оскуола мас дьиэтин оннугар дьэндэйдэ. Оскуола саҥа дьиэтэ Дьокуускай куорат дьаһалтата уонна “ГазЭнергоМонтаж” хампаанньа судаарыстыбаннай-чааһынай бииргэ үлэлиир бырайыак көмөтүнэн үлэҕэ киирдэ.

Тарҕат:

Комментарии

Защитный код Обновить

Болҕойуҥ ! Чэпчэтиилээх сурутуу саҕаланна!

kyym podpiska

Бүтэһик сонуннар