Войти

Войти

Бүгүн, муус устар 17 күнүгэр Дьокуускайдааҕы педагогическай колледж дьиэтигэр, Губинскай уокурук бэтэрээннэрин кытта көрсүһүү буолла.

Дьокуускай куорат Губинскай уокуругар Аҕа дойду сэриитин кыттыылаахтара 18 бэтэрээн уонна 251 Тыыл бэтэрээнэ олорор. 202-с түөлбэҕэ бэтэрээннэр дьиэлэрэ баар. Надежда Прохоровна Баишева салайааччылаах бэтэрээннэр сэбиэтэ куорат бары бэтэрээннэр уопсастыбаннай түмсүүлэригэр холобур буолар кыахтаах.

Бу күн мустубут бэтэрээннэри кэлэн иһэр Маай бырааһынньыгынан уонна Улуу кыайыы 74 сылынан уокурук бас-көс дьоно, ыччат истиҥник эҕэрдэлээтилэр. Бэтэрээннэр сэбиэтин бэрэссэдээтэлин солбуйааччы Валентина Васильевна Васильева “Убаастабыллаах бэтэрээннэр, эһигини кэлэн иһэр Улуу кыайыы бырааһынньыгынан ис сүрэхпиттэн эҕэрдэлиибин. Эһиэхэ чэгиэн доруобуйаны, оҕолоргут, сиэттэргит куруук ситиһиилээх буоллуннар” диэн эҕэрдэ тылын эттэ уонна спонсор “Кофейный дом” туруорбут сэмэй бэлэхтэрин туттарда. “Ситим” медиа-бөлөх генеральнай дириэктэрэ, Ил Түмэн дьокутаата Мария Николаевна Христофорова бэтэрээннэргэ эҕэрдэ тыл бастыҥын анаата: “Улуу кыайыы 75 сылын бэлиэтиирбит сылтан ордук күн хаалла. Бу күнү эдэрдиин-эмэнниин бары олус күүтэбит. Бүгүҥҥү тэрээһин Дьокуускайдааҕы педагогическай колледж дьиэтигэр буола турарыттан тус бэйэм олус үөрдүм. Тоҕо диэтэххэ, бу колледж өрөспүүбүлүкэ үрдүнэн биир самай кырдьаҕас үөрэх кыһата буолар. Маннык көрсүһүүлэргэ ыччат кыттыыны ылара олус үчүгэй. Бэтэрээннэр Улуу кыайыы туһунан үтүө өйдөбүлү төһө кыалларынан   ыччакка тиэрдэ сатыахтаахтар дии саныыбын. Улуу кыайыыны уһансыбыт ытык кырдьаҕастар бу бырааһынньыгы дьоһуннук көрсүөхтээхтэр. Эһиги олоххо  көххүт өссө  күүһүрэригэр   баҕарабыт”.

Бүгүҥҥү тэрээһини талааннаах ыччат ырыанан-тойугунан, үҥкүүнэн киэргэттэ.

Тарҕат:

Комментарии

Защитный код Обновить