Войти

Войти

Муус устар 20-тэн ыам ыйын 20 күнүгэр диэри “Аврора” клиникэҕэ Аҕа дойду сэриитин, Ленинград блокадатын кыттыылаахтарыгар, огдооболоругар уонна тыыл бэтэрээннэригэр аналлаах “Өйдүүбүт. Киэн туттабыт. Махтанабыт” (“Помним. Гордимся. Благодарим.”) диэн аахсыйа буола турар. Биир ый устата бэтэрээннэр тустаах исписэлиистэргэ буор-босхо көрдөрүнэр, сүбэ-ама ылар кыахтаннылар.

Аахсыйа туһунан сиһилии “Аврора” клиникэ эмтиир үлэҕэ дириэктэри солбуйааччы Евдокия Сергеевна Павлова маннык кэпсиир: “Улуу Кыайыы 74 сылын көрсө Ил Түмэн дьокутаата Мария Николаевна Христофорова этии киллэрэн, биһиги клиникэбитигэр Өйдүүбүт. Киэн туттабыт. Махтанабыт” диэн аахсыйа ыытылла турар. Бу аахсыйанан Дьокуускай куорат Киин уонна Набережнай уокуруктарыгар олорор сэрии, тыыл бэтэрээннэригэр, огдооболоругар, Ленинград блокадатын кыттыылаахтарыгар УЗИ, ЭКГ, сахар, холестерин анаалыстарын буор-босхо оҥоробут. Ону таһынан, быраастартан сүбэ-ама ылыахтарын сөп.   Бүгүҥҥү күҥҥэ диэри биэс сэрии бэтэрээнэ, алта тыыл бэтэрээнэ доруобуйаларын туругун көрдөрүннүлэр, быраас сүбэтин ылан үөрдүлэр-көттүлэр”.

Клиникэ Пояркова 20/1 уулуссаҕа турар сып-сырдык, кип-киэҥ саҥа дьиэтигэр сылдьан Борис Арапович Оглов диэн сэрии бэтэрээнин көрүстүм. Кини босхо аахсыйаны туһанан кыыһын кытта хараҕын көрдөрүнэ кэлбит. Борис Арапович олоҕун сэгэтэн кылгастык маннык кэпсээтэ: “Мин 1926 сыллаахх ыам ыйыгар Ростов-на-Дону куоракка күн сирин көрбүтүм. Онтон төрөппүттэрбин кытта Чита куоракка көспүтүм. 18 саастаахпар Аармыйаҕа ыҥырыллыбытым. Дьоппуоннары кытта сэриигэ сылдьыбытым. Кэлин Дьокуускайга көһөн кэлэн тутууга суоппарынан онтон кырааҥҥа үлэлээбитим. Биэнсийэҕэ тахсан баран чааһынай тэрилтэҕэ кырааҥҥа 82 сааспар диэри үлэлээбитим. Бары билэр “Дом быта” дьиэтин тутуспутум. Үлэм түмүгүнэн “Үтүөлээх тутааччы” буолбутум. Ону таһынан, “Кыайыы” уонна “Бочуот бэлиэтэ” уордьаннарынан наҕараадаламмытым. Түгэнинэн туһанан бу аахсыйаны тэрийбит дьоҥҥо улахан махталбын тиэрдэбин.”

Кыыһа Наталья Борисовна Неженцева: “Аҕам төһө да 93-с хаарын санныгар ууллардар, билигин да сэниэлээх, бэйэтин көрүнэр. Инньэ гынан, соҕотох олорор. Мин киниэхэ соҕотох оҕото буолабын. Икки сиэннээх, түөрт хос сиэннээх уонна биир хос-хос сиэннээх. Кыайыы бырааһынньыгын олус үчүгэйдик бэлиэтээтибит. Араас тэрилтэлэртэн кэлэн эҕэрдэлээн, аска-үөлгэ тиийэ бэлэх бөҕөтүн туттардылар. Ону таһынан, уубут турбатын уларытаннар аҕам үөрүүтэ муҥура суох. Аны бүгүн “Аврора” клиникэҕэ кэлэн   хараҕын көрдөрө сылдьабыт. Маннык аахсыйалар ыытыллаллара олус үчүгэй. Аныгы үйэҕэ бэтэрээннэргэ наһаа табыгастаах дии саныыбын. Мин быйыл Дьокуускайга үһүспүн кэллим. Бэтэрээннэргэ улахан болҕомто ууралларын сырыы аайы сөҕөбүн. Куруук эрийэллэр, билсэллэр. Аҕам бэйэтин бэйэтэ көрүнэр буолан социальнай үлэһиккэ соччо наадыйбат курдук. Ол да буоллар социальнай үлэһиттэр кэлэн көрөн-истэн бараллар. Аҕам сайын аайы дачатыгар тахсар. Онно ону-маны гынан хамсанар, сэргэхсийэр. Куорат дьаһалтатыгар, биирдиилээн тэрилтэлэргэ болҕомтоҕут иһин биһиги дьиэ кэргэн аатыттан улахан махталбытын тиэрдэбит ”.

Венера Охлопкова

Тарҕат:

Комментарии

Защитный код Обновить