Сыырдаах бөһүөлэгэр төгүрүк сыл үлэлиир “Саюри” саҥа тэпилииссэ иккис уочарата аһылынна. Манна дьоппуон технологиятынан оҕуруот аһын үүннэриэхтэрэ. Бырайыак Дьокуускай куорат дьаһалтатын уонна “Алмаасэргиэнбаан” көҕүлээһиннэринэн олоххо киирдэ.
2016 сыллаахха “Алмаасэргиэнбаан” уонна “Hokkaido Corporation” диэн дьоппуон хампаанньата Дьокуускай куоракка тэпилииссэ комплексын тутууну саҕалаабыттара. Бу сылга 1 га иэннээх экспериментальнай тэпилииссэ тутуллубута. Оттон бэҕэһээ, ыам ыйын 14 күнүгэр 1,2 га иэннээх иккис уочарата тутуллан үлэҕэ киирдэ. 2020 сылга 2 га иэннээх үһүс тэпилииссэ тутуллара былааннанар.
Тэрилтэ сылга 1,9 тыһ туонна бородууксуйаны оҥорон таһаарар былааннаах. Бу Дьокуускай куорат нэһилиэнньэтин оҕуруот аһынан 20 % хааччыйар кыахтаах. Оҕуруот аһа аҕыс ый атын эрэгийиэнтэн кэлэр сиригэр олус улахан суолталаах. Бырайыак толору күүһүн ылан үлэлээтэҕинэ, Дьокуускай куораты уонна чугас сытар улуустары 25% оҕурсунан, 10% помидорунан уонна 4% күөх үүнээйинэн хааччыйар кыахтаах. 2019 сылга былаан быһыытынан 395 туонна оттон 2020 сылга 1038 туонна оҕуруот аһа ылыллыахтаах.
Тэпилииссэҕэ дьоппуон технологиятынан үс араҥалаах бөлүөҥкэ туттуллар. Бу 94% сырдыгы киллэрэр. Онон өстүөкүлэттэн быдан үчүгэй. Тэпилииссэ килиимэтин көмпүүтэр нөҥүө салайаллар. Сиигирдэр гидропоннай систиэмэ туруоруллубут.
Тэпилииссэ комплексын аһыллыытыгар “Hokkaido Corporation” хампаанньа дэлэгээссийэтэ кытынна. Тыйыс айылҕалаах Саха сиригэр тутуллубут ураты тэпилииссэ өрөспүүбүлүкэ олохтоохторун төгүрүк сыл устата сибиэһэй, ыраас, хаачыстыбалаах оҕуруот аһынан хааччыйыа диэн, СӨ бырабыыталыстыбатын бэрэссэдээтэлэ Владимир Солодов эҕэрдэ тылын эттэ.
