Воронеж куоракка аччыгый куораттарга уонна историческэй суолталаах сирдэргэ тупсаҕай эйгэни тэрийиигэ бастыҥ бырайыактар Бүтүн Арассыыйатааҕы күрэхтэрин кыайыылаахтара ааттааннылар. Бу туһунан Ил Дархан уонна бырабыыталыстыба пресс-сулууспата иһитиннэрэр.
Бу күрэххэ уопсайа 330 сайаапка киирбититтэн 80 бастыҥ бырайыагы ааттаатылар, ол иһигэр Покровскай уонна Ньурба куораттар. Кыайыылаах куораттар бырайыагы олоххо киллэриигэ анаан 40-нуу мөл. солк. ылыахтара.
“Бу күрэх – биһиги дойдубут сүрүн күөн күрэһэ. Биһиги куораттарбытыгар тупсаҕай эйгэни олохтуурга бэрэсидьиэн дьаһалынан киэҥ далааһыннаах үлэни саҕалаабыппыт. Оччолорго бу балысхан үлэ улахан куораттары уонна нэһилиэнньэлээх пууннары эрэ хаарыйарын тута өйдөөбүппүт. Инньэ гынан, аччыгый куораттар уонна историческэй суолталаах нэһилиэктэр ойдон хаалар курдук буолбуттара. Оттон кинилэр эмиэ сайдыахтаах, тупсуохтаах буоллахтара. Ол иһин биһиги маннык күрэһи чуолаан кинилэргэ анаан ыытарга сөбүлэспиппит. Кинилэр эмиэ дьон олоҕун тупсарыыга кыахтарын көрдөрүөх тустаахтар” , — диэн дойду вице-премьерэ Виталий Мутко бэлиэтээбит.
Бу быйылгы күрэххэ кыттарга Нерюнгри, Алдан, Ленскэй, Мииринэй, Бүлүү, Удачнай, Верхоянскай, Ньурба уонна Покровскай куораттар сайаапкаларын биэрбиттэр. Маннык күрэх быйыл иккистээн ыытыллар. Манна 100 тыһ. диэри нэһилиэнньэлээх аччыгый куораттар, итиэннэ федеральнай уонна эрэгийиэн суолталаах историческэй дьон олорор сирдэрэ кыттар кыахтаахтар. Күрэххэ эрэгийиэн кииннэрэ уонна федеральнай суолталаах куораттар кыттар кыахтара суох. Быйылгыттан күрэх “Олорор дьиэ уонна куорат эйгэтэ” диэн национальнай бырайыак чэрчитинэн ыытыллар, онно анаан 5 млрд солк. бириис пуондата көрүллэр.
