Дьокуускай баһылыгын территориялары сайыннарыыга боппуруостарыгар быстах кэмҥэ эбээһинэһин толорооччунан Евгений Григорьев ананна. Бу туһунан бүгүн дьаһалта планеркатыгар мээр СардаанаАвксеньтева эттэ.
Сардаана Владимировна Евгений Гриогорьевы “эдэр, салайар талааннаах киһи, “Лидеры России” күрэх финалиһа” диэн билиһиннэрдэ. Баһылык солбуйааччытыгар сүрүн үлэ хайысхаларын өсcө төгүл тоһоҕолоон эттэ. Бастатан туран, “Хаачыстыбалаах уонна куттала суох суоллар” федеральнай бырагыраама чэрчитинэн куорат суолларын капитальнай өрөмүөнүн кыраҕатык кэтээн көрөрүгэр эттэ. Маны таһынан, быйыл хаарбах дьиэттэн көһөрүү бырагыраама иккис долгуна барыахтаах. Итиэннэ, Григорьев сир сыһыаннаһыыларыгар уонна куорат тутуутун бэлиитикэтигэр үлэлиир муниципальнай тэрилтэлэргэ оптимизацияны, уларыта тутууну ыытарга эппиэттиэҕэ.
Маны таһынан, Авксеньтева урукку сылларга маассабайдык сокуоннайа суох куорат сирин түҥэтии ыытыллыбытын бэрэбиэркэлээһини күүһүрдэр тоҕоостооҕун эттэ.
Санатар буоллаха, ааспыт бээтинисэҕэ, бэс ыйын 7 күнүгэр, куорат баһылыгын солбуйааччы Василий Гоголев тутуллубута, киниэхэ холуобунай дьыаланы көбүппүттэрэ уонна атырдьах ыйын 6 күнүгэр диэри СИЗОҕа утаарбыттара. Василий Гоголевы силиэстийэ кэмигэр дуоһунаһыттан тохтоппуттара. Кинини куорат биир тутар тэрилтэтин дириэктэрэ “бэрик көрдүүр” диэн үҥсүүтүнэн хаайбыттара. Саҥа баһылыгы солбуйааччы Евгений Григорьев бу иннинэ «Муниципальный специализированный застройщик Агентство по развитию территорий города Якутска» ХЭУону салайан олорбута.
Василий Кононов хаартыската
