Киирии

Киирии

От ыйын 8 күнүгэр, дьиэ кэргэн, таптал уонна бэриниилээх буолуу күнүгэр Дьокуускай куорат 203 түөлбэтигэр,  киин куоракка эйэлээх ыаллаһан олоруу сылынан сквер үөрүүлээх арыллыыта буолан ааста. Манна Дьокуускай куорат баһылыгын бастакы солбуйааччы Владимир Юрьевич Федоров, Губинскай уокурук салайааччытын эбээһинэһин толорооччу Гулжан Абдикеримовна Огонерова, норуот дьокутаата, “Ситим” медиа-бөлөх генеральнай дириэктэрэ Мария Николаевна Христофорова уонна түөлбэ олохтоохторо, ыалдьыттара кыттыыны ыллылар. Үөрүүлээх тэрээһини 203 түөлбэ ыстаарасталарын сэбиэтин бэрэссэдээтэлэ Наталья Викторовна Луковцева иилээн-саҕалаан ыытта.

Владимир Юрьевич мустубут дьоҥҥо эҕэрдэ бастыҥын анаата: “Убаастабыллаах 203 түөлбэ олохтоохторо, эһигини дьиэ кэргэн, таптал уонна бэриниилээх буолуу күнүнэн эҕэрдэлиибин. Бу күн биһиэхэ ураты суолталаах дии саныыбын. Тоҕо диэтэххэ, өрөспүүбүлүкэ хас биирдии ыала дириҥ устуоруйалаах, силистээх-мутуктаах, көлүөнэттэн көлүөнэҕэ бэриллэр үгэстэрдээх. Инньэ гынан, бу сквер бүгүн арыллара олус үөрүүлээх уонна бэлиэ түгэн буолар.

203 кыбаартал саҥа сайдан эрэр. Олохтоохтор уонна чугастыы түөлбэ дьоно олус иллээхтэр. Куорат дьаһалтата олохтоохторго бары усулуобуйаны олохтуурга туруулаһыа диэммин эрэннэрэбин. Эһиги санааҕытын, этиилэргитин истэргэ бэлэммит. Оттон эһиги куорат, кыбаартал олоҕор көхтөөхтүк кыттыҥ диэммин ыҥырабын. Манна олус көхтөөх ыстаарасталар бааллар. Кинилэр ыытыллар мунньахтарга көхтөөхтүк кытталлар уонна эһиги этиилэргитин тиэрдэллэр. Дьиэ кэргэн бырааһынньыгынан дьоллоох олоҕу, этэҥҥэ буолууну баҕарабын”.

IMG 20190709 WA0013 1

Салгыы Ил Түмэн народнай дьокутаата, “Ситим” медиа-бөлөх генеральнай дириэктэрэ Мария Николаевна баҕа санаатын тиэртэ: “Үтүө күнүнэн күндү доҕоттор! Чуолаан 203 түөлбэ ыстаарасталарын сэбиэтин үлэтин бэлиэтиэхпин баҕарабын. Манна хас биирдии дьиэ туспа сирэйдээх курдук. Эйэлээх ыаллаһан олоруу күүһэ онтон тахсар дии саныыбын.

Губинскай уокурукка бу соторутааҕыта “Набережный вчера, сегодня, завтра” диэн хаартыска куоҥкуруһун биллэрбиппит. Түгэнинэн туһанан, барыгытын үөрүүлээх түгэннэри хаартыскаҕа түһэрэн кыттыҥ диэн ыҥырабын. Куорат күнүгэр бастыҥ үлэлэри бэлиэтиэхпит диэн эрэнэбин. Ону таһынан, 2017-2018 сылларга “Добрые ручки” диэн аахсыйа буолбута. Манна дьон үтүө санаатыгар, көмөтүгэр наадыйар дьоҥҥо анаан үтүлүктэри хомуйбуппут. Уопсайа 500 тахса  үтүлүк хомуллан өрөспүүбүлүкэ араас муннугар тарҕатыллыбыта. Бу аахсыйаны салгыы Федоровтар дьиэ кэргэҥҥэ тиэрдиэхпин баҕарабын. Уонна 203 түөлбэ олохтоохторугар, ыстаарасталарыгар ситиһиилэри баҕарабын. Барыгытыгар улахан махтал”.

IMG 20190709 WA0007

Губинскай уокуруктан   салайааччы эбээһинэһин толорооччу Гулжан Абдикеримовна эҕэрдэлээтэ: “Эһигини Губинскай уокурук уонна салайааччы Айаал Семенович Бурцев аатыттан, бүгүҥҥү бырааһынньыгынан эҕэрдэлиирбин көҥүллээн. Манна саамай көхтөөх ыстаарасталар үлэлииллэр диэтэхпинэ, бука, сыыспатым буолуо. Кинилэр бүтүн куорат олохтоохторугар холобур буолаллар. Маннык тэтиминэн оҕолорбут, сиэннэрбит олохторо өссө чаҕылхай, ыраас буоларын туһугар элбэҕи ситиһиэхпит дии саныыбын. Куорат баһылыга Сардана Владимировна Авксентьева биллэрбит эйэлээх ыаллаһан олоруу сылынан  эйэни, ситиһиини, дьолу баҕарабын”.

20190708 180202

203 түөлбэ ыстаарасталарын сэбиэтин бэрэссэдээтэлэ Наталья Викторовна Луковцева: “Бу биһиги ыстаарасталарбыт, түөлбэ олохтоохторун көҕүлээһиннэринэн уонна  дьаһайар хампаанньалар өйөбүллэринэн, Дьокуускай куоракка эйэлээх ыаллаһан олоруу сылыгар уонна дьиэ кэргэн, таптал, бэриниилээх буолуу күнүгэр анаммыт тэрээһин буолар. Ол курдук, 40, 25 сыл бииргэ олорбут уонна саҥа ыал буолбут дьиэ кэргэттэр ыалдьыттыахтара. Кинилэри ыал буолууну тарҕатар,   ыччакка холобур оҥорор сыаллаах ыҥырдыбыт. 203 саҥа түөлбэ буолан, биһиги саҥа олохсуйан эрэбит. Инньэ гынан, олохтоохтор эйэлээхтик ыаллаһан олороллоругар   баҕарабын. Бүгүн дьаһайар хампаанньалар көмөлөрүнэн сквер арыйан эрэбит. Бу сквер олорор түөлбэни харыстыырга, таптыырга ыҥырар. Сквери ааттыырга Инстаграм социальнай ситим нөҥүө куоҥкурус биллэрбиппит. 80-ча барыйаан киирбитэ. Олортон таламмыт сквербитин “Эйэлээх   ыаллаһан олоруу скверэ” диэн ааттаатыбыт. Эйэлээх ыаллаһан олоруу сыла түмүктэниэ, оттон биһиги куруук иллээхтик-эйэлээхтик олоруохтаахпыт”.    

IMG 20190709 WA0003

IMG 20190709 WA0005

IMG 20190709 WA0006

IMG 20190709 WA0010

IMG 20190709 WA0012

Бу күн ыал буолан бииргэ олорбуттара 40 сылынан Любовь Афанасьевна уонна Павел Павлович Игнатьевтары, үрүҥ көмүс сыбаайбаларынан Анна Ивановна уонна Дьулустан Васильевич Постниковтары уонна бэс ыйыгар саҥа ыал буолбут Денис, Дарья Петровтары эҕэрдэлээтилэр. Кинилэргэ өйдөбүнньүк мэтээллэри, бэлэхтэри туттардылар. Ону таһынан, дуобатка Аан дойду чемпионатыгар кытта бараары сылдьар Эргис Яковлевы өйүүр сүүйүүлээх лотерея ыытылынна. Саха эстрадатын чаҕылхай ырыаһыттара Сахамин уонна Розалина Файрушина ылбаҕай ырыаларын бэлэхтээтилэр.

Тарҕат:

Комментарии

Защитный код Обновить