Киирии

Киирии

“Туймаада” XXVI олимпиадаҕа дойду 20 эрэгийиэниттэн уонна Румынияттан, Казахстантан, Сингапуртан, Болгарияттан, Таджикистантан, Ирантан 150 үөрэнээччи кыттар. От ыйын 8-14 күнүгэр математикаҕа, физикаҕа, химияҕа уонна информатикаҕа олимпиадалар буолаллар. 

“Туймаада” XXVI олимпиада кыттыылаахтарын көрсүү миэхэ улахан чиэс буолар. Бу олимпиада аан бастаан 1994 сыллаахха СӨ бастакы бэрэсидьиэнин Михаил Николаев көҕүлээһининэн ыытыллыбыта. Ол кэмтэн ыла Аан дойду бастыҥ үөрэнээччилэрин мунньар үгэс күн бүгүнүгэр диэри салҕанар”, – диэн СӨ бырабыыталыстыбатын бэрэссэдээтэлэ Владимир Солодов бэлиэтээтэ.

СӨ үөрэх уонна билим министиэристибэтин миниистирэ Владимир Егоров олимпиада кыттыылаахтарын эҕэрдэлээтэ: ““Туймаада” Аан дойдутааҕы олимпиада Саха сирин эрэ буолбакка, бүтүн Арассыыйа үөрэҕин брендэ буолар диэтэхпинэ алҕаһаабатым буолуо. Манна уопсайа 3 тыһ тахса оҕо кыттыбыта, кыайыылаах буолбуттара. Билигин ол оҕолортон үгүстэрэ учуонайдар, араас эйгэ үлэһиттэрэ, салайааччылара буоллулар”.

Олимпиада бырагыраамматыгар үгэс курдук химия, физика, математика уонна информатика киирэллэр. Кыттааччылары ХИФУ профессора  Айталина Охлопкова, физико-математическай билим хандьыдааттара  Никифор Павлов, Ефим Неустроев уонна Евгений Шарин дьүүллүөхтэрэ. 

Кыайыылаахтар мэтээлинэн, дипломунан уонна анал бириистэринэн наҕараадаланыахтара. Казахстаҥҥа уонна Румынияҕа үрдүк үөрэх кыһатыгар экзэмэнэ суох киирэр кыахтаналлар. Инньэ гынан, Румынияттан сылдьар Бухарест куорат Аан дойдутааҕы лиссиэйин үөрэнээччитэ  Теодора Стан  кыайыыга эрэллээх: “Мин маннык улахан олимпиадаҕа хаһыс да төгүлүн кыттабын. Ол эрэн Саха сиригэр бастакыбын кэллим, олус сөбүлээтим. Бириистээх миэстэҕэ тиксэн мэтээл кэтиэхпин баҕарабын”.

ysia.ru

Тарҕат:

Комментарии

Защитный код Обновить