Киирии

Киирии

Дьокуускай куорат Ленин проспегын 10-с №-дээх дьиэтин олохтоохторо кэккэ кыһалҕалары көрсөн, бу соторутааҕыта Ил Түмэн дьокутаатын Мария Христофорованы   кытта көрүстүлэр.

Ол төрүөтүнэн балаҕан ыйын 18 күнүнээҕи мээрийэ куораты тутуу департаменын суруга буолар. Ол курдук, муниципальнай былаастар бу дьиэ олохтоохторуттан  алтынньы 18 күнүгэр диэри, икки этээстээх хоспох уонна турар сирин бас билии докумуоннарын ирдээбиттэр. Ону тиксэрбэт түгэннэригэр  хоспохтор көтүрүллэллэрин туһунан иһитиннэрбиттэр.

20191004 102549

Ленин проспегын 10-с №-дээх дьиэтэ 1958 сыллаах тутуу. Бастакы таас дьиэлэртэн биирдэстэрэ буолар. Манна култуура диэйэтэллэрэ, үөрэхтээһин бастыҥ үлэһиттэрэ олороллор.   Дьиэ болкуоннара суох буолан, урут мас ампаардары тутан биэрбиттэр.

Онтон 1995 сыллаахха “СахаИнвест” тэрилтэттэн   мас ампаардар оннугар икки этээстээх таас хоспохтору тутан биэрэр туһунан этии киирбит. Олохтоохтор сөбүлэҥнэрин ылан  ампаардар турбут миэстэтигэр административнай дьиэни туппуттар. Билигин манна түүннэри үлэлиир  бардар бааллар. Инньэ гынан, олохтоохтор бас билэр докумуоннара суох. Ол саҕана саҥа хоспохтор күлүүстэрин эрэ туттарбыттар. Ол эрэн, олохтоохтор номнуо 15 сыл устата  бэйэлэрин бас билиилэрин курдук тутта сылдьаллар.

IMG 20191022 WA0038

Олохтоохтор бу сыл муус устар 21 күнүгэр куорат баһылыгар Сардана Авксентьеваҕа киирэ сылдьыбыттар. Ол түмүгүнэн атырдьах ыйын 13 күнүгэр уопсастыбаннай истии ыытыллыбыт. Ол түмүгүн үс ыйынан, балаҕан ыйын 27 күнүгэр биирдэ ылбыттар. Куораты тутуу департамен бэрэбиэркэтэ “РИЧ Сервис” ХЭТ (эбийиэк урукку бас билээччитэ) сайабылыанньатынан оҥоһуллубут. Бу сыл бэс ыйын 10 күнүгэр бас билээччи уларыйбыт. Саҥа хаһаайын олохтоохторго үҥсүүтэ суох.

IMG 20191022 WA0042

Ол гынан баран, олохтоохтор сотору-сотору полиция үлэһиттэрин ыҥырарга күһэллэллэр. Тоҕо диэтэххэ, манна аһыы утаҕы атыылыыр түүҥҥү бардар үлэлииллэр. Инньэ гынан, күнүстэри-түүннэри дьон, массыына сырыыта тохтообот. Түүҥҥү бардарга   орто холуочук дьон мустара саарбаҕа суох. Кинилэр хаһыылара-ыһыылара, массыыналар тыастара-уустара бу дьиэ чуумпу олоҕун аймаабыт. Аанньа буолуо дуо, барыта оройдоругар иһиллэ турдаҕа.       Субу-субу бэрээдэги кэһии тахсар буолан, бу сылга полицияҕа 58 ыҥырыыны түһэрбиттэр. Ол иһигэр 41 ыҥырыы бэрээдэги кэһиигэ буолар.

20191004 102741

Бү дьиэҕэ үгүстэрэ биэнсийэлээх дьон олороллор эбит. Саастаах дьон тулуйалларыттан ааһан, “бүтэһик эрэлбит эн эрэ буолаҕын” диэн Мария Николаевнаны ыҥырбыттар.   Аҕа саастаах уонча дьахтар   мустан, аһаҕас халлаан анныгар тымныыны тымныы диэбэккэ, үс бакыакка мунньуллубут докумуоннарын көрдөрө-көрдөрө кыһалҕаларын барытын кэпсээтилэр.

Дьокутаат хоспохтору көтүрүүнү аккаастыыр быһаарыныыга олохтоохтору өйүүр туһунан куорат борокуруоругар В.В. Денисюкка иһитиннэрии ыытта. Олохтоохтор дьокутааты кытта көрсөн баран мээрийэҕэ бардылар. Онно кинилэри административнай хамыыһыйа мунньаҕар ыҥырбыттар. Олохтоохтор кыһалҕаларын хамыыһыйа бэрэстэбиитэллэрэ бастакытын иһиттилэр. Ол эрэн, кинилэр түүҥҥү бардары кытта ыаллыы олороллорун туһунан кыһалҕаларын центральнай уокурукка уонна Дьокуускай куорат дьаһалтатыгар билэллэр.


yakutia24.ru

Тарҕат:

Комментарии

You have no rights to post comments

Бүтэһик сонуннар