Алтынньы 26 күнүгэр Маҕан бөһүөлэгэр “Ритм” диэн саҥа култуура дьиэтин үөрүүлээх арыллыыта буолан ааста. Олохтоохтору бу бэлиэ күнүнэн уонна бөһүөлэк 145 сыллаах үбүлүөйүнэн куорат баһылыга Сардана Авксентьева эҕэрдэлээтэ.
Тэрээһиҥҥэ Ил Түмэн мунньаҕын экономикаҕа, инвестиционнай уонна промышленнай политикаҕа олохтоох кэмитиэтин бэрэссэдээтэлэ Павел Петров, култуура уонна духуобунай сайдыы миниистирин бастакы солбуйааччы Владислав Левочкин, куораттааҕы Дума бэрэссэдээтэлэ Альберт Семенов, куорат баһылыгын социальнай хайысхаҕа солбуйааччы Наталья Степанова, куораттааҕы Дума Мархатааҕы быыбардыыр уокурук дьокутаата Андрей Лебедев кыттыыны ыллылар.
Сардана Авксентьева Ил Дархан Айсен Николаев саҕалаабыт дьыалата олоххо киирбититтэн мустубут дьону эҕэрдэлээтэ уонна махтанна. “Бу култуура дьиэтэ Маҕан олохтоохторугар улахан суолтаны ылара саарбаҕа суох. Мантан инньэ оҕолор, улахан да дьон талааннарын, дьоҕурдарын сайыннарар кыахтаннылар”, – диэн эттэ.
Бэлиэ күлүүһү бөһүөлэк дьаһалтатын салайааччы Михаил Юмаев култуура дьиэтин дириэктэригэр Татьяна Тарасенкоҕа туттарда. Татьяна Тарасенко бу күҥҥэ кулуупка 13 куруһуок уонна түөрт ойоҕос түмсүүлэр үлэлииллэрин, баларга уопсайа 180 тахса киһи сылдьарын киэн тутта кэпсээтэ. “Саҥа култуура дьиэтэ муниципальнай бырагыраамма чэрчитинэн тутулунна. Онон, Айсен Сергеевич Николаевка уонна Сардана Владимировна Авксентьеваҕа улахан махталбытын тиэрдэбин. Биһиги олус үөрэн, сүргэбит көтөҕүллэ сылдьабыт”, – диэтэ.
Маҕан олохтооҕо Дмитрий Ефремов: “Биһиги дьиэ кэргэн кыра оҕолоохпут. Кини улааттаҕына дьоҕурун, талаанын манна чочуйуо диэммит эрэнэбит”, – диэн үөрүүтүн үллэһиннэ.
