Ахсынньы 13 күнүгэр Хомсомуол аатынан болуоссакка, ГИБДД Саха сиринээҕи салаатын үлэһиттэрэ тыйыс усулуобуйалаах сиргэ аналлаах 62 саҥа массыына күлүүһүн туттулар.
Саҥа тиэхиньикэлэр “Безопасное дорожное движение” уонна “Безопасные и качественные автомобильные дороги” диэн национальнай бырайыактар чэрчитинэн аҕалыллыбыттар. Кэлэр сылга өссө отучча массыына кэлэрэ күүтүллэр.
СӨ ис дьыала миниистирэ, полиция генерал-мойуора Владимир Прокопенко иһитиннэрбитинэн, инспекция үлэһиттэрэ суолга куттал суох буолуутун хааччыйыыга үчүгэй көрдөрүүлэри ситиспиттэр. Ол курдук, суолга саахал тахсыыта 16,9 %, суолга өлүү ахсаана 26,4 %, эчэйиини ылыы 18,8 %, сокуоннай саастарын ситэ илик оҕолор кыттыылаах саахал тахсыыта 15,5 %, итирик туруктаах дьон саахалга түбэһиитэ 26,6 % аччаабыт.
Саҥа массыыналар сайаапка быһыытынан муниципальнай тэриллиилэринэн тарҕаныахтара.