“Сосновый бор” обсерваторга 85, оттон инфекционнай балыыһаҕа 30 киһи сытар. Оҕо инфекционнай балыыһатыгар үс оҕо баар. Кинилэр анаалыстара бигэргэммэтэх. Бу туһунан пленарнай мунньахха куораттааҕы доруобуйа харыстабылын салалтатын начаалынньыга Леонид Апросимов иһитиннэрдэ.
Кулун тутар 22 күнүнээҕи көрдөрүүнэн, туспа сытар дьонтон 15 атын омук дьоно. Ол курдук кинилэр Кытайтан, Францияттан, Киргизияттан, Узбекистантан, Украинаттан, Черногорияттан уонна Белоруссияттан кэлбиттэр. Өрөспүүбүлүкэтээҕи суһал штаб иһитиннэрбитинэн, хоруона вируһунан ыалдьыбыт “ЯТЭК” хампаанньа сэттэ үлэһитигэр ыарыы чэпчэкитик ааһар. Кинилэр чугас дьоннорун бастакы анаалыстара үчүгэйдэр.
Дьону обсерваторга “ЯПАК” оптуобустара илдьэллэр. Ону таһынан, баҕалаах чааһынай таксыыстары үлэлэтээри былаанныыллар. Леонид Апросимов этэринэн күҥҥэ 25 тиэхиньикэ ирдэнэр. “ЯПАК” начаалынньыга Валерий Домотов, суоппардары харыстанар тэриллэринэн хааччыйар наадатын эттэ.
