Харантыын. Ким төбөтө хайдах үлэлииринэн дьаһанар. Сорох уолуйан ыйдааҕы аһын хаһаанаары маҕаһыыны дьиэтигэр көһөрөн аҕалар, сирэйин тууна баанар, дьиэтигэр бүгэр, кими да киллэрбэт. Дьон үгүстэрэ кыра оҕолорун тыа сиригэр куоттараллар. Сатабыллаах өттүлэрэ сирэй хаххатын тигэн эргинэллэр. Чэ, быһата, харантыын барыбыт олохпутугар кыра сүпсүлгэни киллэрдэ. Оттон Дьокуускай биир олохтооҕо коронавирустан харыстанан куорат киинигэр турар гостиницаҕа көһөн олохсуйда.
Артур Сердюк куорат “Марракеш” үс сулустаах гостиницатыгар баҕа өттүнэн бүгэргэ быһаарыммыт. Кини ханнык да соҕуруу дойдуттан көтөн кэлбэтэх, ыарыһаҕы кытта алтыспатах, көннөрү, бэйэтин харыстанар санааттан биир нэдиэлэлээх харантыыны гостиница нүөмэригэр атаарарга санаммыт. Артур Александрович үөрэх эйгэтин үлэһитэ, спортсмен бэйэтин быһаарыныытын туһунан маннык этэр:Биһиги үөрэнэн хаалбыт олохпут бэрээдэгэ уларыйарыгар үгүспүт бэлэмэ суоҕун көрдөрдө. Уларыйыы хаһан баҕар ыарахан. Тоҕо эрэ бу дьаҥ биһигини таарыйыа суоҕа, тумнуо дии саныыбыт, улахаҥҥа уурбаппыт, ол эрээри, атын дойдулар балаһыанньаларын көрдөххө, судургута суох кэм ааннаан иһэр быһыылаах. Кыйма курдук элбэх ахсааннаах кытайдар коронавируһу кытаанах дьиссипилиинэ, бэрээдэк уонна хас биирдии киһи эппиэтинэстээх буолан кыайдылар. Биһиги ону өйдүөхпүтүн наада. Биир бэйэм доруобуйабын уонна тулалыыр дьоммун харыстыыр санааттан уонча хонуктаах бүгүүнү таллым.
Гостиница хаһаайката Наталья Храмцова Артур Сердюк гражданскай эппиэтинэһин хайҕаан, олорор кэмин төлөбүрүгэр чэпчэтии оҥорбут: Артур Александрович быһаарыныытын биһиги өйдүүбүт уонна өйүүбүт. Харантыын саҕаланыаҕыттан гостиницабытыгар дезинфекция үлэтин күүһүртүбүт, үлэһиттэр күҥҥэ хаста да хостору, элбэх киһи сылдьар сирдэрин сууйаллар, быыллыыллар. Ыалдьыппыт көрдөһүүтүнэн, аһылыгын нүөмэрин аттыгар аҕалан хаалларабыт.
Артур Сердюк маннык баҕа өттүнэн бүкпүтүн астынар. Бу да сыттар, ыраахтан (дистанционно) үлэлиир, онуоха гостиница улахан кыамталаах интэриниэтэ үлэтин хааччахтаабат, эбиитин ноутбук уларсыбыттар.
Спортсмен уонча күн иһигэр улугуран хаалбакка, эт-хаан, өй-санаа өттүнэн сынньанар, тупсар былааннаах, онуоха кини хамсанарыгар олорор нүөмэрин киэҥ иэнэ да сөп түбэһэр, тулалыыр чуумпу даҕаны көмөлөһөр.
