Дьокуускайдааҕы 2-с №-дээх балыыһа медсиэстэрэтэ хоруона-вируһунан ыалдьыбытын туһунан сурах өрөспүүбүлүкэни тилийэ көппүтэ. Кини анаалыһын Новосибирскайга ыыппыттара, дьолго үчүгэй көрдөрүүлээх. Ол туһунан бүгүҥҥү брифиҥҥэ Ил Дархан Айсен Николаев иһитиннэрдэ.
Онон күн устата 2-с №-дээх балыыһаттан харантыын уһуллуоҕа. Ону таһынан, Ил Дархан биир хонук иннинэ биир киһи үтүөрбүтүн уонна бүгүн “Сосновый бор” обсерватортан 80 киһи тахсарын туһунан эттэ. Айсен Сергеевич өрөспүүбүлүкэҕэ балаһыанньа кэминэн, саҥа ыалдьыбыт дьон суох диэн иһитиннэрдэ.
