Сардаана Авксеньтева киин куорат урбааҥҥа, потребительскэй ырыынак уонна туризм сайдыытын департаменын саҥа начаалынньыгынан Ирина Седованы анаата. Бу туһунан мээрийэ саайтыгар суруллар.
Бу иннинэ Ирина Седова Дьокуускай урбаанньыттарын Ассоциациятын салайбыт.
Ыспыраапка:
Ирина Седова 2002 сыллаахха Арассыыйа ИДьМ Уһук Илиннээҕи юридическэй институтун Саха сиринээҕи филиалын “Юриспруденция” идэтийиитин туйгуннук бүтэрбит.
1997-2002 сс. өрөспүүбүлүкэ ис дьыала уорганнарыгар сулууспалаабыт, бөлөҕүнэн оҥоһуллар буруйдары силиэстийэлиир управление силиэстийэлиир чааһыгар силиэдэбэтэл дуоһунаһыттан үлэтин саҕалаабыт, ол кэннэ наркотигы эргитиини бохсор управление оперуполномоченнайынан үлэлээбит.
2002-2009 сс. “Ассоциация предпринимателей г. Якутска” кэммиэрчэскэйэ суох партнерствоҕа юристаабыт. 2009-2020 сс. бу тэрилтэ дириэктэринэн үлэлии олорбут.
2010-2012 сс. Саха сирин Арбитраж суутугар арбитраж сэтээтэлинэн сылдьыбыт. Мээрийэ саайтыгар сурулларынан, Седова уопсастыбаннай деятель быһыытынан олус көхтөөх, урбааҥҥа сыһыаннаах хас да сэбиэт чилиэнэ.
