Саха сирин салалтата Дьокуускай куоракка кэтэх дьиэни туттууну сайыннарар пилотнай бырайыак чэрчитинэн 100-чэ дьиэни тутаары гыналлар. Бу туһунан бырабыыталыстыба бастакы бэрэссэдээтэлин эбээһинэһин толорооччу Кирилл Бычков иһитиннэрбит.
“Пилотнай бырайыак чэрчитинэн киин куораппытыгар Базовай переулок уонна Бүлүүлүүр аартык 6 км баар учаастактарга 1-4 этээстээх 100-чэ дьиэни тутуохпут. Олорор дьиэ уопсай иэнэ 24,61 тыһ. кв.м. итэҕэһэ суох, онно 1,3 тыһ. тахса киһи олохсуйуоҕа”, - диир Кирилл Бычков.
Кини этэринэн, тутуллуохтаах дьиэлэр иккилии этээстээх, гаражтаах, 100 кв.м. тахса иэннээх таас уонна мас буолуохтара. Дьиэлэр типовой бырайыагынан тутуллуохтара. Онуоха саҥа кыбаарталы бүтүннүү тупсарыахтара, суол уонна социальнай инфраструктура тутуллуоҕа. Билигин бырайыагы баай-дуол уонна социальнай сайдыы министиэристибэтигэр сөбүлэһиигэ ыыппыттар.
Бу иннинэ дойду бэрэсидьиэнэ Владимир Путин бырабыыталыстыбаҕа уонна Арассыыйа Бааныгар кэтэх дьиэни (ИЖС) тутары өйүүргэ ыҥырбыта. Онуоха тутуу министиэристибэтэ анал бырайыагы оҥорбут. Ол чэрчитинэн баантан чэпчэтиилээх ипотека кирэдьиитин биэрии эҥин көрүллүбүт.
