Киирии

Киирии

Сандал саас салаллан, кыһыны кыйдаан, бэйэтин күүһүгэр толору киирэн эрэр. Дьокуускай куорат олохтоохторун уонна ыалдьыттарын номнуо 6-с сылын “Северное сияние” муус паарката көй салгыҥҥа сынньатар. Манна көрүөхтэн кэрэ муус, хаар оҥоһуктар, сыыр, хаҥкылыыр сир уо.д.а. арааһа баар. Муус пааркаҕа кэлбит эрэ барыта астына-дуоһуйа сынньанан, биһирээн барар.

Бэҕэһээ, муус устар 8 күнүгэр, муус пааркаҕа үгэс буолбут кыһыны атаарыы бырааһынньыга буолан ааста. Бу үөрүүлээх тэрээһин – муус пааркаҕа быйылгы дьыл тиһэх улахан тэрээһининэн буолла.

ice park1

Тэрээһиҥҥэ олус элбэх дьон тоҕуоруспут. Кинилэр “халлаан сылыйарын, хаар уулларын төһө да кэтэстэрбит, эмиэ даҕаны муус пааркабыт уулларыттан хомойор курдукпут” дэһэллэр.

Икки ый устата күн ахсын пааркаҕа тыһыынчанан киһи дуоһуйа сынньанна. Норуот тапталын, биһирэбилин ылбыт паарка аны эһиилгэ диэри сабылынна.

Бэҕэһээҥҥи тэрээһиҥҥэ көрү-нары көҕүлүттэн туттулар. Араас оонньуулар, кэнсиэр, чуучаланы уматыы, күрэхтэр, бырааһынньыктааҕы фейерверк, атыы-кутуу, үҥкүү-битии уо.д.а. тэрээһиннэр кэлбит дьону астыннарда.

ice park4

Муус устар 2-8 күннэригэр атыылаһыллыбыт киирии билиэттэринэн сүүйүүлээх лотерея буолла. Манна ювелирнай хампаанньалартан сэртипикээт, сыаналаах бириистэр оонньоннулар. Оттон “Киинстрой” тутуу хампаанньатыттан сүрүн бирииһи – квадроциклы 57 саастаах, Дьокуускай куорат олохтооҕо Галина Викторовна сүүйдэ. Кини кыыһа “ийэм олоҕун тухары хаһан да, тугу да сүүйбэтэҕэ. Биһиги дьиэ кэргэнинэн Муус пааркаҕа сөбүлээн сынньанабыт. Куораппытыгар маннык сынньанар сир баара олус үчүгэй. Квадроцикл сүүйүөхпүт диэн санаабатахпыт. Онон соһуччу бэлэх буолла. Муус паарка кэлэктиибигэр барҕа махталбытын тиэрдэбит”, - диир.

ice park2

ice park3

Үтүмэн үгүс үөрүүнү бэлэхтиир Муус пааркаҕа эһиил көрсүөххэ диэри!

Тарҕат:

Ырытыыгын суруй

Защитный код
Обновить

Бүтэһик сонуннар