4-с №-дээх коррекционнай оскуола саҥа дьиэҕэ көстө

4-с №-дээх анал коррекционнай оскуола 25 №-дээх оскуола эбии дьиэтигэр көһөрүллэр буолбут. Бу туһунан Дьокуускай куорат үөрэххэ управлениета иһитиннэрэр.

Дьокуускай куорат борокуратуурата иһитиннэрбитинэн, суукка модьуйуу көрүллүбүтүн түмүгэр, борокуратуура туорарсар ирдэбиллэрэ толоруллубуттар: Чайковскай уулуссатын 113 нүөмэрдээх хаарбах дьиэтигэр үлэлии турбут 4 №-дээх анал коррекционнай оскуолаҕа үөрэх бобулунна.

Ол курдук, анал коррекционнай оскуола Яков Потапов уулуссатын 4а диэн аадырыһыгар турар 25 №-дээх оскуола эбии дьиэтигэр көһөр буолла. Санатан эттэххэ, 2019 сыллаахха 25 №-дээх оскуола үс мэндиэмэннээх саҥа дьиэтэ тутуллубута.

Бу урукку өттүгэр  «Сахагипрозем» тэрилтэ дьиэтэ өрөспүүбүлүкэ уонна куорат бүддьүөтүн суотугар атыылаһыллыбыта, «Главстрой» тэрилтэ күүһүнэн саҥалыы уларытан оҥоһуллубута.

Уопсайа 2 тыһыынча кв.миэтэрэ иэннээх дьиэҕэ аактабай саала, остолобуой, библиотека, таҥас ыйыыр сир, 12 үөрэнэр кэбиниэт, алын кылаас үөрэнээччилэригэр гимнастическай саала уонна мэдэссиинэ хоһо баар.

куор«Бу дьиэ коррекционнай оскуолаҕа сөп түбэһэр – оҕо ахсаанынан, ураты усулуобуйалаах кэбниэттэринэн, ол иһигэр логопед хоһо эмиэ баар. Билигин 25 №-дээх оскуола кылаастара сүрүн дьиэҕэ көһөллөр. Онно тохсунньу ый бүтүөр диэри 4-с №-дээх анал коррекционнай оскуола көһөр», – диэн үөрэх управлениетын начаалынньыга Алексей Семенов иһитиннэрдэ.