Куорат мээрин эбээһинэһин толорооччу Евгений Григорьев иһитиннэрбитинэн, быйыл Дьокуускайга 20 саҥа ичигэс оптуобус тохтобулун тутар былааннаахтар. Бу туһунан мээрийэ пресс-сулууспата иһитиннэрэр.
"Куорат олохтоохторо ичигэс тохтобулларга кир-хох, амырыын сыт-сымар турарын уонна үлэлиир графиктарын тутуспаттарын үгүстэ үҥсэргииллэр. Сорохтор тохтобулларга соччо наадата да суох тэрилтэлэр үлэлииллэрин эмиэ этинэллэр. Онон биһиги бу кыһалҕаны быһаарарга төрдүттэн уларытар үлэни ыытарбыт уолдьаста", - диэн Евгений Григорьев мунньах кэмигэр эппит. Быйыл киин куорат уулуссаларын ситимин саҥардарга күүстээх үлэ ыытыллыахтаах. Ол чэрчитинэн саҥа ичигэс тохтобуллар тутуллан, куортамҥа бэриллиэхтээхтэр. Өскөтүн куортамҥа ылбыт тэрилтэлэр тохтобулу үчүгэйдик туппат буоллахтарына, ону муниципальнай тэрилтэлэргэ биэртэлиэхтэрэ.
