Дьокуускай куорат бэйдиэ сылдьар кыыллары тутар пууна иһитиннэрэринэн, кулун тутар 5 күнүттэн ыла киин куоракка 42 дьэллик ыты туппуттар. Ордук элбэх сайаапка Гагаринскай, Автодорожнай уокуруктартан уонна Марха түөлбэтиттэн киирэр.
Күн ахсын Биир кэлим дьуһуурунай диспиэччэригэр (ЕДДС) куорат араас муннуктарыттан 13-17 сайаапка киирэ турар эбит. Кулун тутар 10 күнүнээҕи туругунан, бэйдиэ сылдьар кыыллары тутар пууҥҥа 203 ыт хааллан сытар. Тутуллубут ыттар тута харантыыҥҥа бараллар, кинилэри бэтэрэннэрдэр көрөллөр-истэллэр: вакцина туруораллар, ууһуур уорганнарын ыраастыыллар, наада буоллаҕына эмтииллэр. Ол кэннэ, сокуон ирдэбилинэн төттөрү уулуссаҕа ыыталлар. Кулун тутар 6 күнүгэр ыттары тутарга эбии 8 масыынаны ылбыттар. Ыттары тутууга управалар үлэһиттэрэ күүс-көмө буолаллар. Санатар буоллахха, олунньу 8 күнүттэн бэс ыйын 1 күнүгэр дылы куорат үрдүнэн 3 ыйдаах санитарнай ыраастаныы биллэриллибитэ, онно дьэллик ыттары дьаһайыы эмиэ киирэ сылдьар.
