Войти

Войти

Дьокуускай куорат соҕуруу өттүгэр, ДСК оройуонугар, урукку байыаннай чаас оннугар саҥа кыбаарталы тутууну бэлэмниир үлэлэр саҕаланнылар. Урукку байыаннай чаас сабыллан, ол 68,5 гаа сирин өрөспүүбүлүкэҕэ биэрбиттэрэ.

"Саҥа олорор сир түөлбэтигэр аныгылыы олорор дьиэлэр дьэндэйиэхтэрэ. Билигин атыылаһааччылары интэриэһинэй кыбартыыраларынан эрэ угуйбаккын. Кинилэр үчүгэй уопсастыбаннай сынньанар сирдээх, сөптөөх социальнай инфраструктууралаах сири көрдүүллэр. Бу саҥа тутуллар "Сулустаах" диэн кыбаарталга араас мэндиэмэннэрдээх 66 олорор дьиэ тутуллуохтаах. Бырайыак быһыытынан, онно 11 тыһ. киһи олохсуйуохтаах. Онно 2 уһуйаан тутуллуоҕа, инньэ гынан 690 иитээччини ылыаҕа. Маны таһынан, 1980 үөрэнээччигэ анаммыт икки оскуола, 600 киһи биирдэ көрдөрүнэр поликлиника баар буолуоҕа. Дьон сынньанарыгар диэн сабыылаах катоктаах, араас успуорт саалалардаах киин дьэндэйиэҕэ. Маны таһынан, саҥа түөлбэ чугаһынан баһаарынай чаас баар буолуоҕа", - диэн тутуу миниистирэ Павел Кылатчанов бэлиэтиир.

Саҥа түөлбэ бастакы түһүмэҕин тутарга, "Республиканское ипотечное агентство" 2022 сылга дылы 7 элбэх кыбартыыралаах (698 кыбартыыра баар буолуоҕа, уопсай иэнэ - 26508 кв. м.) дьиэни тутуоҕа. Саҥа кыбаарталга сатыы, бэлэсипиэттээх дьон дьаарбайалларыгар анаан 6 км усталаах анал ыллыктаах буолуоҕа. Күөл кытыыта тупсаҕай гына оҥоһуллуо, онно олохтоохтор сынньанар кыахтаныахтара. Билигин тутуу тэрилтэтэ байыаннай чаас бырахпыт эбийиэктэрин көтүрэн саҕалаата.

 

Тарҕат:

Добавить комментарий