Киирии

Киирии

Куорат олохтоохторугар күннээҕи кэлиигэ-барыыга оптуобус абырыыр. Бүгүҥҥү туругунан оптуобуска уу харчынан төлүүр буоллаххына, биир сырыы — 25 солк., оттон тырааныспар хаартатынан саамай чэпчэкитэ 16 солк. айанныахха сөп. Дьокуускай куорат көлөҕө салаатын начаалынньыга Николай Ксенофонтов ыалдьыттыыр.

IMG 20180523 WA0009

Николай Ксенофонтов, Дьокуускай куорат көлөҕө салаатын начаалынньыга:

 

— Куорат олохтоохторо бары да билэ-көрө сылдьалларын курдук, оптуобуһунан айанныыр буоллаххына,а төлөһөргө араас систиэмэ үлэлиир. Холобур, бырайыаһы анал хаартанан төлүөххэ сөп. Ол курдук, 20 айан номиналлаах хаарта биир айана — 20 солк., 40 айан — 18 солк. уонна 60 айан —16 солк.  Санаттахха, уу харчынан бырайыас сыаната — 25 солк.

Маны таһынан “Алмазэргиэнбанк” тэрилтэни кытары сөбүлэҥ түһэрсэн, бырагырааманан хааччыйар үлэни ыытабыт. Ол эбэтэр, оптуобуска анал тэрил баар, пассажир бырайыаһы тырааныспар хаартатынан төлүүр уонна кибитээнсийэ ылар. Бу систиэмэҕэ киирбиппит син балай эмэ буолла. Аны туран, бу тэрилгэ өссө сиэп төлөпүөнүнэн бырайыас сыанатын ылан аахсыан сөп. Билигин Aндроидтарга “play Market”  уонна Apple “App Store” сыһыарыыларга “карта города Якутска” диэн баар. Бу манна киирэн, сыһыарыыны төлөпүөҥҥэ хачайдыахха уонна баан хаартатын кытары ситимниэххэ  наада. Бу бырайыак олоххо саҥа киирэн эрэр буолан, айан сыаната бакаа -- 25 солк. Онон олохтоохтор сотору кэминэн бырайыастарын төлөпүөнүнэн төлүүр буолуохтара. Биллэн турар, бу көстүү — сайдыы уонна хаачыстыба бэлиэтэ. Олохтоохтор, хаарта систиэмэтигэр түргэнник үөрэммит буоланнар, бу уларыйыыга түргэнник үөрэниэхтэрэ диэн бигэ эрэллээхпин.

 —Оптуобус билиэтин сыаната халбаҥныа дуо?

—Бэс ыйын 1 күнүттэн уу харчынан бырайыас сыаната 30 солкуобайга үрдүөхтээх диэн былаан баар. Сыананы Экэниэмикэ дэпэртээмэнэ бигэргэтиэхтээх. Бу көстүү хаартанан төлөөһүн систиэмэтигэр охсуута кыра буолуоҕа. Ол эбэтэр, өскөтүн пассажир айан хаарталаах буоллаҕына, айанын сыаната наһаа үрдээбэт.

—Оттон баан хаартатын туһунан тугу этиэххин сөбүй?

— Баан хаартатыгар аналлаах сыһыарыы ситэ-хото сылдьар. Манна эбэн эттэххэ, пассажирдар оптуобуска киирэн иһэн, сонно бырайыастарын төлүүр буолуохтара. Ол аата бастакы аанынан киирэллэр, иккис аанынан тахсаллар. Бу систиэмэ үлэлээтэҕинэ, оптуобус суоппара айан кэмигэр аралдьыйыа суох этэ. Онон сайыҥҥыттан саҕалаан оптуобуска кытаанах бэрээдэк олохтонуо дии саныыбыт.

— Дьокуускайга баар оптуобустар үгүстэрэ эргэрэн эрэллэр ээ...

—Орто кылаастаах саҥа оптуобустары күүтэбит. Ол курдук, от ыйын 1 күнүгэр урбаанньыттары 18 саҥа оптуобуһунан хааччыйыахпыт. Бу оптуобустар хайдах эбиттэрин үөрэтэн баран, сыл түмүгэр өссө саҥа оптуобустары сакаастыахпыт.

—Билигин биир оптуобус сыаната төһөнүй?

— Орто кылаастаах оптуобус сыаната 5 мөл.  солк. тэҥнэһэр. Аны туран, кыһын тымныыга оптуобуһу гарааһынан хааччыйыы  эмиэ туспа сыана, оннооҕор сайын оптуобус турар сиригэр кытары харчы төлөтөллөр. Маны таһынан анал ирдэбилинэн дьону таһыынан дьарыктанар урбаанньыт, көлө хаачыстыбатыгар эппиэтинэстээҕин өйдүөхтээх.

— Быһа холоон эттэххинэ, биир күн устатыгар куоракка төһө оптуобус сүүрэрий?

— Күҥҥэ 420-430 оптуобус сүүрэр. Ол эрээри сорох күн өрөмүөн ыытыллар буоллаҕына, бу ахсаан халбаҥныан сөп. Өссө суоппар ыалдьан эҥин хааларын санатабын. Онон быһа холоон 400-тэн тахса оптуобус күн ахсын Дьокуускай куорат араас морсуруутунан дьону таһар.

—Бүгүҥҥү туругунан кэлиигэ-барыыга сыһыаннаах туох кыһалҕа баарый?

— Халлаан сылыйда да, үлэбит үксүүр. Холобур, куоракка субу-субу уулуссаны өрөмүөннээбитинэн бараллар. Онно морсуруут толкуйдаан, барыы-кэлии исхиэмэтин тобулабыт. Ол эрээри ити кыһалҕа буолаахтыа дуо. Туох диэххэ сөбүй, чэ, сүнньүнэн, улахан кыһалҕа суох.

Кэпсэттэ Екатерина АФАНАСЬЕВА.

                                                                                                                                                                                                                       

Тарҕат:

Ырытыыгын суруй

Защитный код
Обновить

Бүтэһик сонуннар