Билиҥҥи сахабыт эстрадатын эйгэтэ араас хайысхалаах-туһаайыылаах эҥин-эгэлгэ ырыаһыттарынан, кыра-улахан “сулустарынан” байа, хаҥыы турар.
Бүгүҥҥү “Кыым” ыалдьыта - Света Бугаева. Бу ааты иһиттэххитинэ, үгүскүт ааспыт 2017 сылга “тренд” (улахан сонун, муода буолбут, дьону соһуппут) буолбут “Гони гынаҕын дуо?” диэн ырыаны санаан кэлэр буолуохтааххыт.
Света күннээҕи олоҕор эппит-тыыммыт, саҥарбыт-иҥэрбит, күлбүт-салбыт бэрт сэргэх киһи эбит. Туох да соруттарыыта суох кэпсээн, ыһан-тоҕон барда. Кини кэпсээнэ-ипсээнэ, баҕар, сорох дьону сөхтөрүө...
- Света, дорообо! Кэпсэтиибитин билсиһииттэн саҕалыахха...
- Оо, дьэ! Хас саастааххыный? Хантан сылдьаҕыный диэ... Саамай куһаҕан ыйытыктартан саҕалыыбыт дуо?
- Тоҕоо?
- Дэриэбинэттэн сылдьабын. Ыал кыра оҕотобун. Икки эдьиийдээхпин. Биир араадьыйаҕа үлэлиир эдьиийбин Индираны билэр буолуохтааххыт. Уонна тугу кэпсиэхпин сөбүй?
- Хайыа-а, өрөспүүбүлүкэ араас улуустарын кэрийэн ыллыыгын дии... Онон эн олоххун-дьаһаххын элбэх киһи интэриэһиргиир буолуохтаах...
- Ыллаабытым, кэлбитим-барбытым ырааттаҕа дии. Икки сыл буолла. Хоту диэки айанныы иликпин. Ааспыт сыл алтынньытыгар “Гони гынаҕын дуо?” диэн ырыам тахсыбытын кэннэ, киһи барыта миигин интэриэһиргиир буолла. Били, саҥа төрөөбүт оҕо курдукпун...
- Туох идэлээххиний?
- Муусука колледжыгар академическайдык ыллыыр салааны бүтэрбитим. Ол кэннэ үп-экэниэмикэ институтугар, менеджмент идэтигэр үөрэнэн, ситиһиилээхтик түмүктээбитим. Бастаан утаа “култуураттан тэйдэҕим буолуо” дии санаабытым. Кэлин ылбыт идэбинэн үлэлии сылдьыбытым эрээри, ырыаҕа төннөн кэллим. Миэхэ дьон-сэргэ ортотугар сылдьар, көҥүл олох быдан барсар эбит.
- Кыра эрдэххиттэн ырыаһыт буолар баҕа санаалаах улааттаҕыҥ буолуо...
- Кыра сылдьан, төрөппүттэрбитигэр кэнсиэр көрдөрөр этибит. Эдьиийим Индира биллэрээччи, биһиги ырыаһыт-үҥкүүһүт буоларбыт. Онтон дьыссаакка, оскуолаҕа сылдьан, актыбыыс, чаҕылхай оҕо этим. Хаһан да муннукка саһан, саҥата-иҥэтэ суох бүгэн сылдьыбатаҕым.
- Дьэ, эн “уруккуттан ыллыыбын” диэтиҥ. Ол эрээри эйигин дьон үксэ бу күһүн тахсыбыт, дьикти тыллаах-өстөөх, “Гони гынаҕын дуо?” диэн ырыанан эрэ билэллэр. Тугу кистэлэ кэлиэй, толоос, быдьар соҕус тыллаах-өстөөх ырыа диэххэ наада...
- (күлэр). Бастаан өссө быдьар ааттаах этэ. Ону өссө сымтанан ааттаабыт дьүһүммүт дии. Ырыа тылын биир дойдулааҕым Федот Соловьев суруйбута. Биирдэ кини “маннык ырыа төбөбөр киирдэ” диэбитигэр, наһаа сэҥээрбитим. “Ырыаҕын аҕал, көннөрү хайптыам” диэн буолбута. Түргэн үлүгэрдик Антон Ивановка тиийэн, ырыа муусукатын оҥоро охсубуппут.
- Ол аата түргэнник дьон болҕомтотун тарда охсуоххутун баҕардаххыт...
- Көр-күлүү курдук доҕотторбор тарҕатыам дии санаабытым. Онтум баара ажиотаж буолбута, салгыы килиип тахсыбытын кэннэ, букатын да аҕыс айдаан диэбиккэ дылы (күлэр)...
“Гони гынаҕын дуо?” диэн ыллыы-ыллыы дьон алларастаан барбытыгар, өссө өрө баран, килиип устарга санаммытым. Килииби Федор Тарасов диэн киһи түргэн үлүгэрдик оҥорон биэрбитэ. Биир күн иһигэр көстүүнэйинэн, тутулла турар дьиэлэринэн сылдьан устубуппут. Килиип “ютубка” тахсар күнүгэр аны төлөпүөнүм алдьанан хаалбыта. Ол быыһыгар өссө тыаҕа бараары сүүрэ-көтө сылдьыбытым. Онон түмүктээх килииби бэйэм да үчүгэйдик көрбөккө, интэриниэккэ таһаарбыппыт.
Дьэ, онно үчүгэй соҕустук төлөпүөн оргуйан олордо ээ!!! Билэр-билбэт дьонум бары суруйан, эрийэн барбыттара, боппуруос-иппириэс бөҕөтө... Киһини аһатар, утутар да бокуой суоҕа...
- “Сулус буолан уһуктубутум” диэ...
- Эс, сулустар халлааҥҥа бааллар. Мин хантан “сулус” буолуохпунуй?
- Бастаан интэриниэккэ тахсыбыт интервьюгар “биэс оҕолоохпун, 45 саастаахпын уонна 4-тэ эрдэнэ сылдьыбытым” диэн кэпсээбит этиҥ дии...
- Ону барытын ыраас мууска ууруллубут курдук санаан итэҕэйбиккит дуо? Ээ, ити көннөрү кыһыйан эппит быһыым... Киһи барыта араастаан, саҥара-иҥэрэ, үөҕэн хооһурҕата, “куһаҕан дьахтар” дии сырыттаҕына, өрө барар буоллаҕым дии...
- Тапталга төһө итэҕэйэҕиний?
- Баччааҥҥа диэри таптал диэн тугун билэ иликпин. Эдэр сылдьан “таптаатым” дии санаан, эргэ тахса охсубутум. Онтум букатын да атын этэ... Мин тула араас мөкү сурах-садьык баарын истэбин-билэбин, иллэҥ бириэмэлээх буоллахпына, интэриниэккэ олорон ол дьону кытта тото-хана аахсыахпын, быһаарсыахпын сөп. Ол эрээри, кинилэр куһаҕан тыллара-өстөрө миэхэ тиийбэт, онтон куттаммаппын. Мин бэрээдэгэ суох сэлээр дьахтар буоларбын кинилэр бука дакаастаабаттара буолуо... Миигин үөҕэллэриттэн, кириитикэлииллэриттэн, этэргэ дылы, “кайф” эрэ ылабын. Барытын собус-соруйан оҥоробун, ол кэриэтэ миигин харса суох “кирпииччэ сирэй” дии санаатыннар.
- Бу күннэргэ орто тарбаххын көрдөрөн түспүт хаартыскаҥ бассаапка тарҕанна... Эн, уопсайынан, тугу ситиһэ сатыыгыный?
- Онно туох баарый? Аан дойду “сулустара” бары арааһынайдаан хаартыскаҕа түһэллэр, тоҕо эрэ ким да туох да диэбэт ээ! Мин оонньоон хаартыскаҕа түспүтүм буруй буолар дуо? Биһиги кыраны үллүннэрэн кэпсээн оҥосторбутун, омуннуурбутун наһаа сөбүлүүбүт! Манна эбэн эттэххэ, миигин үөҕэр эр дьон гей эбэтэр импотент буолуохтарын сөп. Оттон миигин үөҕэн тыыннарын таһаарар дьахталларга эр киһиттэн болҕомто тиийбэтэ эбэтэр, дьүһүннэрэ мөкү буолан, ордугургуу саныыллара буолуо. Кинилэр миэхэ төһөнөн куһаҕаны ыралыыллар да, соччонон миэхэ үчүгэйинэн төннөр. Мин онтон күүс-уох эбинэбин, санаалыын чэпчиибин, көтүөхпүн эрэ кынатым суох буолар. Билигин кэнсиэрдэргэ да ыллыыбын, араас тэрээһиннэргэ да ыҥыраллар. Дьэ, онно элбэх дьон миигин кытары үҥкүүлээн битийэллэр, тэҥҥэ сахсыллыы бөҕөтө буолаллар. Ол онтон мин сүрдээх улахан эниэргийэ, күүс ылабын...
- Уобараскын, истиилгин ким толкуйдууруй?
- Кыһыл пайеткалаах туруусукпун этэҕин дуо? Онно киһи толкуйдуу сатыыра туох да суох. Дьиҥэр, ити кыһыл шортик ээ. Ону сымыйанан, “алҕас, кыһыл турууһугун көрдөрбүт” диэн суруйаллар. Хайдах алҕас буолуой? Соруйан буоллаҕа дии... Уобарас! Санаан көрүҥ ээ, маҥан былааччыйаны кытары кыһыл ытарҕаны хайдах кэтиэхпиний? Кыһыл дьүһүннээх ытарҕа кыһыл шортикпар майгынныыр. Салгыы сыанаҕа тахсар уобараспын өссө интэриэһинэй гына толкуйдуом, көстөн иһиэ...
- Сыанаҕа тахсаргар төһө долгуйаҕыный, биирдэ циркэҕэ буолбут кэнсиэргэ охтон түһэ-түһэ ыллаабытыҥ дии...
- Ити баҕас соруйан буолбатах этэ. Былаачыйам сабыгар түүппүлэм сыстан хаалан, сыыһа туттан, охтон түспүтүм. Маныаха, циркэ муостата бэйэтэ куһаҕан баҕайы ээ. Элбэх артыыс сыыһа-халты туттубут буолуохтаах. Мин сыанаҕа тахсарбар букатын долгуйбаппын. Сорохтор этэллэр ээ, “дьиҥнээх артыыс долгуйуохтаах” диэн. Биирдэ эмэ дьону үтүктэн долгуйа сатааччыбын да, сатанааччыта суох. Сыанаҕа таҕыстахпына бэйэм эйгэбэр киирэн хаалабын. Туох да хааччах суох.
- Дьэ, сыанаҕа тутта-хапта сылдьарыҥ курдук, күннээҕи олоххор эмиэ бэрт бойобуой киһи эбиккин. Оҕо сааһыҥ хайдах ааспытай?
- Аҕам суох буолбута 10 сыл буолла. Мин иллээх дьиэ кэргэҥҥэ улааппыт, дьоллоох оҕобун. Ыал кыра оҕото буоламмын, атаахтык иитиллибитим. Ас-таҥас үчүгэйэ барыта миэхэ этэ. Билигин “90-с сыллар наһаа ыараханнар этэ” диэн кэпсииллэр. Ол ыарахан кэми биһиги дьиэ кэргэн үчүгэйдик ааспыппыт. Ийэм таҥас-сап атыылыыр дьарыктаах буолан, араас муодунай таҥаһы таҥнарым, үчүгэй онньуурдарынан оонньуурум уонна ас минньигэһин аһыырым. Онон дьоллоох оҕо сааһым иһин төрөппүттэрбэр, ордук чуолаан ийэбэр, улахан махталлаахпын. Ийэм билигин да үлэ үөһүгэр сылдьарыттан үөрэбин, киэн туттабын.
- Света, иллэҥ кэмҥин хайдах атаараҕыный?
- Оҥостон сытан минньигэстик аһыырбын уонна киинэ көрөрбүн сөбүлүүбүн. Ону таһынан, астыыртан дуоһуйуу ылабын, хаһаайка быһыытынан түргэн-тарҕан туттуулаахпын. Өссө дьүөгэлэрбин кытары күүлэйдиирбин, кулуупка сылдьарбын, дуоһуйа сынньанарбын сөбүлүүбүн. Урут бэркэ сынньанар этим, билигин сыыһа-халты туттубуппун эмиэ интэриниэккэ быраҕыахтара диэн куттал (күлэр). Оонньоон этэбин, наада буоллаҕына, өссө кыһыта таарыйа, араас видео устан таһаарыахпын сөп. Дьоҥҥо ол интэриэһинэй.
- Биллэр-көстөр киһи бэйэтин көрүнүөхтээх, чөл олоҕу тутуһуохтаах...
- Айылҕаттан быһыым-таһаам үчүгэй. Өссө эбии успуордунан дьарыктанар этим. Билигин тохтоон сылдьабын. Салгыы айар үлэҕэ үлэлиир буоллахпына, куһаҕан дьаллыкка охтубакка, таһаарыылаахтык, кыайыылаахтык сылдьыахпын баҕарабын.
- Ол аата киһи ыллаан айаҕын ииттиэн сөп эбит дуо?
- Ииттиминэ. Ыҥырыынан сылдьан ыллыыбын, улуустары кэрийэбин. Дэриэбинэлэргэ биһиги кэнсиэрдэрбитигэр киһи бөҕө тоҕо анньан кэлэр. Ньургуйаана Сыроватская диэн тамаданы кытта өрдөөҕүттэн ыла үлэлиибит. Биһиги кэккэбитигэр быйыл Сергей Сорокин диэн ырыаһыт киирэн айаҥҥа сылдьыста.
- Света, билигин эн Инстаграм ситимигэр элбэх ааҕааччылааххын. Быһыыта, онон анаан дьарыктанаҕын, бириэмэҕин аныыгын да быһыылаах...
- Соло баар буоллаҕына, миигин кытары үөхсэр дьону кытары үөхсэбин, кэпсэтэр дьону кытта кэпсэтэбин (күлэр). Кэлин араас саастаах дьахталлар сүбэҕэ наадыйан суруйаллара элбээтэ. Интэриниэттэн наһаа тутулуктаммаппын эрээри, син олоробун. Эр дьон элбэхтик суруйаллар да, олорго наадыйбаппын.
- Эн саамай улахан баҕа санааҥ?
- Бэйэбэр кытаанах доруобуйаны баҕарабын! Онтон атына барыта баар буолуо...
Кэпсэттэ
Екатерина АФАНАСЬЕВА.
