Киирии

Киирии

Олунньу 14 күнэ – тапталлаахтар күннэрэ. Сибэтиэй Балантыын сахаҕа төһө да сыһыана суоҕун иһин, бу күнү үгүс таптаһар сүрэхтэр бэлиэтииллэр. Туох да диэбит иһин, таптал курдук нарын иэйии баар буолан олох салҕаннаҕа. Бүгүн Саха сирин олохтоохторугар болҕомто киинигэр сылдьар кэргэнниилэри билиһиннэрэбит.

Екатерина, Алексей Егоровтар

Егоровы

Норуот сөбүлээн истэр, ытыктыыр ырыаһыттара Екатерина уонна Алексей Егоровтар былырыын сүрэхтэринэн сөбүлэһэн, харахтарынан хайҕаһан ыал буолан олорбуттара номнуо 35 сылын бэлиэтээбиттэрэ.

Алексей биир үтүө күн ийэтин кытары тэлэбиисэр көрө-көрө чэйдии олорбуттар. Арай күөх экраҥҥа Чурапчы агитбиригээдэтин кэнсиэрэ кэлэ турар эбит. Сонно тута Алексей Катя Тытыгынаеваны бэлиэтии көрөн баран, ийэтигэр “олус да кырасыабай кыыс, кини мин кэргэним буолуоҕа” диэн дьээбэлээн кэриэтэ эппит. Онуоха ийэтэ күлэн эрэ кэбиспит. Ити 1981 сыллаахха, Алексей аармыйаттан саҥа кэлбит кэмэ эбит. Онтон иккиэн Москубаҕа үөрэнэ сылдьан чугастык билсэн, таптал уота күөдьүйэн ыал буолбуттара. Уруу киэһэтин Чурапчыга оҥорбуттара. Алексейдаах Екатерина икки дьоһуннаах уолу атахтарыгар туруордулар, минньигэс сиэннэр эбэлээх эһэлэрэ.

Санита Ай уонна Эрхаан

Санита

Эстраадабыт биир саамай нарын уонна дьоллох дьиэ кэргэнэ – Санита Ай уонна Эрхаан. Аан бастаан Эрхаан Эстрада Театрыгар Санита күүстээх куолаһын истэн абылаппыт. Онтон ыла биир эйгэҕэ буһа-хата сылдьар дьон чугастыы билсэн, хара маҥнайгыттан тапсан барбыттар. Эрхаан бастакы кэргэнин кытары кыайан олорботохторо. Онуоха Софья Федорова – Санита Ай толлон турбатаҕа, кини Аркадийга бүк эрэнэр, саамай чугас истиҥ доҕоро буолбута. Дьоллоох дьиэ кэргэн 3 уоллаахтар.

Айталина уонна Вячеслав Лаверновтар

Лаверновы

Саха театрын биллэр артыыстара, хас да киинэҕэ уһуллубут Айталина уонна Вячеслав Лаверновтар Арктикатааҕы култуура уонна ускуустуба институгар туттарса сылдьан бэйэ-бэйэлэригэр болҕомтолорун хатаабыттар. Онтон иккиэн биир факультекка киирэн баран, чугастык билсэн барбыттар. Үһүс кууруска үөрэнэ сылдьан лоп курдук Саҥа Дьыл иннинэ Вячеслав аан бастаан тапталга билиммит уонна кыталыктыы быһыылаах үрүҥ көмүс ытарҕаны бэлэхтээбит. Онтон 2011 сыл балаҕан ыйын 2 күнүгэр сыбаайбалаабыттар. Лаверновтар уол оҕолоохтор.

Кристина уонна Герман Устиновтар

Устиновы

Биллэр охчут, Лондоннааҕы Олимпиада кыттыылааҕа Кристина уонна тустуук Герман Устиновтар спорт эйгэтигэр саамай биллэр дьиэ кэргэн. Кристина Германы аан бастаан 2011 сыллаахха оскуола көрүдүөрүгэр көрсүбүт. Кини оччолорго хомууртан саҥа кэлэ сылдьара. Германы көрөн баран бииргэ кылааска үөрэнэр дьүөгэтиттэн Валя Сорокинаттан “Ити кимий? Онус кылаастарга саҥа уол кэлбит дуо?” диэн ыйыппыт. Оччолорго Герман 8-с кылааска үөрэнэрэ, тоҕо эрэ бэйэтин саастыылаахтарыттан дьоһуннаахтык көстөрө. Кристина оскуолаҕа сылдьан саҥа уолу наар хаадьылыыр идэлээх эбит. Онтон 2012 сыллаахха Олимпиадаҕа бэлэмнэнэр буолан оскуолаҕа аҕыйахта үөрэммит. Онтон Оонньуулар кэннэ, оскуолаҕа улахан чиэстээһини оҥорбуттар. Онно Герман сэмээр кыыска утары кэлэн “дорообо” диэбитигэр Кристина ис киирбэхтик эппиэттээбит. Ол кэннэ хас көрүстэхтэрин ахсын дорооболоһоллор, ол эрээри тыл бырахсан кэпсэппэттэр эбит. Уопсайга олоро сылдьан өрөбүллэргэ дойдуларыгар эбэтэр аймахтарыгар баралларыгар хайаан даҕаны сайабылыанньа суруйан бэлиэтэнэллэр эбит. Онно хайаан даҕаны төлөппүөн нүөмэрин ыйаллар эбит. Кристина Герман сайабылыанньатын алҕас кистээн көрбүт уонна сурунан ылбыт уонна ол киэһэ бассааптаабыт. Онтон ыла эдэрдэр чугастык билсэн, доҕордоһон барбыттар. Устиновтар 2016 сыл атырдьах ыйыгар ыал буолбуттара.

Тарҕат:

Ырытыыгын суруй

Защитный код
Обновить

Бүтэһик сонуннар